Shillong, K’Lyngkot 29
Ka kynhun ki rangïalehkai phutbol ka Jylla ka la lah ban pynthikna ban jam sha ka final ha ka Khelo India Youth Games 2024, hadien ba ka la lah ban pynliem noh ïa ka Jharkhand da 5-3 kol ha ka jingïakhun semi final kaba la long ha ka Lah Sngi U Blei ha Chennai.
Kane ka long ka sien kaba nyngkong eh ba kane ka kynhun ïalehkai ka Jylla ka la lah ban jam shaduh ka final ha kane ka lympung. Ha ka Khelo India Youth Games kaba la long ha u 2022 bad 2023, ka Meghalaya ka la shah rem noh ha ka semi final bad ka la ïoh ban khur ïa ka takma rnong.
Kane ka nam jop ka la wan urlong lyngba ka hat-trick jong u Mebanlamlynti Marsharing uba la lah ban thep haduh saw kol, katba ïa kawei pat la thep da u Khaiñkupar Ïawphniaw.
Wat la ka Jylla ka la phah tang kawei ka kynhun ïalehkai phutbol ki shynrang sha ka Khelo India Youth Games, pynban kane ka kynhun ïalehkai phutbol hapoh ka jingïalam u Bah Jeffery Warlarpih (Football Coach) ka la lah ban pynpaw ïa ka jingtbit na ka bynta ban wanrah burom ïa ka Jylla da kaba ka la lah ban pynliem shi syndon ïa ka Jharkhand bad ban jam shaduh ka final.
“Kane ka jinglah ban pynurlong ban jam shaduh ka final ka dei lyngba ka jingtrei shitom da baroh ki khynnah kiba don hapoh kane ka kynhun. Ha kane ka jingïakhun ngi la pyn-khlaiñ bha ha ka bynta kaba shapdeng kat haduh ba ngi la lah ban khur ïa ka jingjop,” la pynpaw u coach ka kynhun u Bah Jeffrey Warlarpih haba ïakren bad u nongthoh khubor.
Ha kane ka jingïaid lynti, ka Meghalaya kaba don ha ka Group-A ka la lah ban pynliem ïa ka Uttar Pradesh da 4-1 kol, kumjuh ïa ka Punjab da 2-1 kol bad ïa ka Tamil Naduh da 2-1 kol na ka bynta ban jam sha ka semi final.
Kumta da kane ka jingjop, ka Meghalaya kan pynkhreh ban ïaknieh ïa ka nam lahduh pyrshah ia ka Punjab ha ka final ka ban long ha ka Sngi Balang (31 tarik) ha ka por 10 baje mynstep. Ka Punjab ka dei ka kynhun kaba la lah ban pynliem ïa ka Odisha ha kawei pat ka jingïakhun semi final kaba la long ha kane kajuh hi ka sngi.
