Nongstoiñ, K’Lyngkot 29
Ka kynhun ïalehkai jong ka Peerless na Kolkata ka la jam sha ka semi final ha ka lympung ïalehkai Invitation Knockout Football Tournament 2023-24 ba la pynlong da ka New Nongstoiñ Sports Social & Cultural Club.
Kane ka nam jop ka la wan urlong hadien ba ka la lah ban pynliem noh da 1-0 kol ïa ka kynhun ïalehkai na ka nongbah Shillong, ka Nangkiew Irat SC ha ka jingïalehkai quarter final kaba la long ha ka Lah Sngi U Blei ha madan News Nongstoiñ.
Haba phai sha katei ka jingïakhun hapdeng kitei ar tylli ki kynhun, ka jingïalehkai ka la long shisha kaba itynnad bad kaba ïakhaid bha. Ka la shim por haduh 88 minit ïa ka Peerless ba kan ïoh pynkhih jar lyngba u Ranajit Sardar.
Haduh ba kut noh jong katei ka jingïalehkai ka Nangkiew Irat kam shym la lah shuh ban pynphai bad kumta ka Peerless ka la ïoh ban khur ïa ka jingjop bad rung ruh sha ka semi final ha kane ka lympung.
Ïa ka nam ‘Man of the Match’ la ïoh ban khur da u rangapkol ka Peerless, u Satyabrata Mana uba la lah ban ïalehkai bha na ka bynta ban khanglad na ka jingshah thep.
