Shillong, K’Lyngkot 29
Ka rephri ba kynsai jong ka Jylla, ka Kong Ri-ïohlang Dhar ka la shah jied ban ïadon bynta ha ka ban pynïaid ïa ki jingïalehkai jong ka lympung ïalehkai jong ka SAFF U19 Women’s Championship 2024 ka ban sdang naduh ka 2 haduh ka 9 tarik u Rymphang ha Dhaka, Bangladesh.
Ka Kong Ri-ïohlang ka dei kaba shong ba sah ha Mawlai Mawïong bad kaba trei ruh kum ka Constable jong ka 1st MLP Battalion.
Halor kane ka jingshah jied ban leit pynïaid ïa kane ka lympung, ka Kong Ri-ïohlang ka la pynpaw ba ka long kaba la pynkhreh namar ba kum ka rephri ka juh pyntbit bha ïalade baroh shi snem namar ba ha kane ka kam rephri ka sngewthuh ba kam lah lypa ban tip lano ka AIFF, ka AFC kin khot ïa ki rephri ba tbit bad ba kynsai ban pynïaid ïa kino kino ki lympung ba ki juh pynlong.
“Hadien kane ka lympung ïalehkai ha Bangladesh, ngam pat lah ban pynpaw eiei sa shano pat ngan shah jied ban leit pynïaid ïa ki jingïalehkai,” la ong ka Kong Ri-ïohlang.
Ka la pynpaw ruh ba kan hap leit ban ïakhun ïa kawei ka jingshah pyntbit (course) ka ban long hapoh Malaysia mynta hi u bnai bad nangne kin sa jied pat ïa ki rephri ban leit pynïaid ïa ki wat ïalehkai kiba khatduh jong ki lympung ïalehkai ka AFC kum ka U-17 bad U-20.
