Agartala, K’lyngkot:
Ki pulit jong ka Railway Police ha Agartala Railway Station ki la ïohlad ban pynpulom ïa ka kam khaïi drok ha kaba la ïadonktilang ha kane ka kam da ki nongkhaïi drok jong ka Bihar, West Bengal bad Tripura, bad ki la ïoh ruh ban kem ïa 6 ngut ki briew ha kane ka jingjia, la ïathuh ki heh pulit.
Ki pulit ki la ong ba ïa u drok uba la kot sha ka T. 15 lak la ïoh ban kurup na kine ki briew kiba la shahkem. Ka kynhun Railway Protection Force (RPF) bad ki pulit ka Government Railway Police (GRP) ki la kem ïa ki 6 ngut ki nongkhaïi drok ha ka jaka sangeh rel ha Agartala bad ïoh ban kurup ïa kumba 1,000 tylli ki bitor Phensedyl haba la khmih bniah na ki.
Ki heh pulit ha Agartala Railway Station ki la ong ba haba ki la ïoh jingtip halor kane ka jingjia, ki la pynsted ïa ka jingpyntreikam ha kaba ki la ïoh ban kem noh ïa kine ki 6 ngut na ka rel Rani Kamalapati Express.
Ki heh pulit ki la ïathuh ba kine ki nongkhaïi drok, baroh ki dei ki nongshong shnong jong ka Bihar, shuh shuh la ïathuh ba ki la phla ba ki la leh ïa kane ka kam sniew da ka jingïarap ki briew kiba ha West Bengal bad Tripura bad kine ki bitor Phensedyl ki dei kiba la thmu ban phah sha ka ri ba marjan sha Bangladesh lyngba ki lynti kiba rieh. Ka la don ka jingmudui ba la pynngat hapoh ka Narcotic Drugs and Psychotropic Substances (NDPS).
