New Delhi, K’lyngkot:
U heh nongïalam jong ka seng Aam Aadmi Party (AAP) u Arvind Kejriwal u la ong ba ka seng jong u kan sa ïakhun hi marwei ha baroh ki konstitwensi ha Haryana ha ka ilekshon Assembly ka ban sa long kham hadien ha une u snem.
Haba ai jingkren ha ka jingïalang paidbah kaba la long ha Haryana, u Myntri Rangbah u la ong ba ka seng AAP kan sa ïakhun ïa ka ilekshon ha baroh 90 tylli ki Assembly konstitwensi ha Haryana.
U la ong ruh ba ha ka ilekshon Lok Sabha yn sa ïakhun bad ki seng hapoh ka kynhun synrop hapoh ka kynhun INDIA.
“Na ka bynta ka ilekshon Lok Sabha la tip ba ngi la thaw da ka kynhun INDIA na ka bynta ka jingïakhun. Na ka bynta ka General Election, ngin sa ïamynjurlang bad ki dkhot jong ka kynhun synrop. Na ka bynta ki ilekshon Assembly, ngin sa ïakhun tang marwei ha baroh 90 tylli ki konstitwensi ha Haryana,” la ong u Kejriwal.
U la bynrap shuh shuh da kaba ong ba ka jingthmu jong ka seng ban ïakhun ilekshon ka long halor ban thaw sorkar.
