Ranchi, K’lyngkot:
Ka ‘Bharat Jodo Nyay Yatra’ jong ka seng Congress kan sa long sa ha Jharkhand ha ka 2 tarik, Rymphang, bad la ong ba u Rahul Gandhi un sa ai jingkren ha ki jingïalang paidbah ki ban sa long ha Pakur distrik ha kaba nangne yn sa sdang ïa kiwei pat ki jingïalang ha ka jylla, la ong u nongïalam jong ka seng ha ka sngi Saitjaiñ.
Ïa ka Yatra yn sa pynlong ha ki ar tylli ki bynta, ha kaba kan sa ïaid sha kumba 804 km ha ki 13 tylli ki distrik ha palat 8 sngi, la ong u President jong ka seng Congress ha Jharkhand u Rajesh Thakur.
“Ïa ki tarik ban pynlong ïa ka Yatra ha Jharkhand la dep ban buh. Kan sa rung hapoh ka jylla ha ka 2 tarik, Rymphang na Pakur distrik,” la ong u Thakur.
Ïa ki surok ba la dei ban ïaid lynti na ka bynta ban pynlong ïa ka Yatra bad ki jingïalang ha kiba bun ki jaka yn sa pynbna shen, u la ong. Kine ki jingïalang kin sa khring ïa kiba bun.
Kum shi bynta ban pynkhreh bha ha kaba ïadei bad kine ki jingïalang, u Thakur bad kiwei pat ki heh jongïalam jong ka seng Congress ha ka jylla kin sa leit ban jurip bniah sha ki distrik bapher bapher.
“Ngi la dep ba leit jngoh lypa ïa ka Ramgarh, Dhanbad, Deoghar, Dumka bad Pakur kum shi bynta ban pynkhreh bad ban pynbit pynbiang ïa ki jingdonkam,” la ong u Thakur.
Ka ‘Bharat Jodo Nyay Yatra’, kaba la sdang na Manipur ha ka 14 tarik, Kyllalyngkot, kan sa ïaid da kumba 6,713 km ha ki 67 sngi, ha kaba kan sa ïaid lyngba ki 110 tylli ki distrik ha ki 15 tylli ki jylla, hashwa ban pynkut ïa ka ha Mumbai ha ka 20 tarik, Lber.
