Shillong, K’Lyngkot 30
Ka Meghalaya ka dangduna sa tang saw wiket na ka bynta ban khur jingjop pyrshah ïa ka Arunachal Pradesh ha ka U-23 men’s Col CK Nayudu Trophy ka ban bteng biang ha ka sngi Balang kaba dei artat ka jingïalehkai kaba saw bad kaba khatduh.
U Swastic Chettri (not out) u la long nongtied uba kynsai da kaba khyrwit haduh 190 run na ka bynta ban pynlong ïa ka Meghalaya ban kamai 368 run. Te kumta ka la buh thong ïa ka Arunachal ba kan kynjoh sha ki 348, hynrei haduh mynta ka dangkynjoh 89/6 bad ka dangdonkam sa 259 na ka bynta ban khur ïa ka jingjop
Kum ban phai dien, ka Meghalaya ka la shah pynkhyllem baroh ki nongtied na ka bynta ban kamai 203 ha ka sngi kaba nyngkong bd hadien ka liang pyrshah ka la tam da 21 ha ka inning kaba nyngkong bad ka la shah pynkhyllem baroh ki nongtied hashwa ba kan kamai 224.
Hynrei hynne ka sngi ka Meghalaya ka la sdang na ki 208/6 ha kaba u Swastic u la khyrwit 95 run. Une u nongtied ba kynsai u la kamai ïa ka shispah run tang hapoh katto katne minit bad hadien u la lah ban jam shaphang ha kane ka jingïalehkai ka jong u. Uwei pat u rangïalehkai uba la lah ban ïalehkai bha haduh kaba kut u dei u Bipin Kumar Ray. Une u nongtied ba kynsai u la khyrwit ïa ka shiteng spah kaba 53 run, kynthup ïa saw tylli ki ‘four’ bad kawei ka ‘six’.
Kitei ki ar ngut ki nongtied ki la lah ban kynjoh sha ki 125 run na ka bynta ka wiket kaba hynñiew. Kane long ka jingïalehkai bha jong ki hadien ba ka Meghalaya ka la hiar sha ki 100/5 hynnin ka sngi bad kane ka dei lyngba ka jingtbit u Swastic bad u Bipin.
Ka Arunachal ka la pyrshang ban ïakhun tygneh pyrshah ïa ka Meghalaya ha kaba ka la ïoh ban kamai run, hynrei u Abhishek Kumar u la lah ban pynkhyllem ar wiket ha ki 2 over bad u la khur biang sa shi wiket hashwa ban kut ka jingïalehkai na ka bynta ban khur 3/23 ha ki 13 over. Kiwei pat ki rangïalehkai ka Meghalaya kiba la lah ban pynhap wiket ki long u Manish Sharma (1/9 ha ki 3 over), Bipin (1/14 ha ki 4 over) bad u Sudhir Sahani (1/31 ha ki 11 over) na ka bynta ban pynkhyllem haduh hynriew ngut ki nongtied ka liang pyrshah bad ka dangsah sa tang 4 wiket na ka bynta ban kynjoh sha ka thong ha ka sngi Balang.
