Shillong, K’Lyngkot 30
Sa tang shisien ïakhun ka kynhun ki rangïalehkai phutbol ka Jylla kan hap ban shim ïa ka rai la kan khur ïa ka takma ksiar ne ka takma rupa ha ka Khelo India Youth Games 2024.
Kane ka kynhun hapoh ka jingïalam u Bah Jeffrey Warlarpih (coach) kan pynkhreh ban ïakhun ïa ka final pyrshah ïa ka Punjab ha ka sngi Balang ha ka por 10 baje mynstep ha Chennai.
Kane ka long ka sien kaba nyngkong eh ba kane ka kynhun ka la lah ban jam shaduh ka final ha kane ka lympung. Ha ka Khelo India Youth Games kaba la long ha u 2022 bad 2023, ka Meghalaya ka la shah rem noh ha ka semi final bad ka la ïoh ban khur ïa ka takma rnong.
Ha ka jingïakhun semi final kaba la long ha ka Lah Sngi U Blei, ka Meghalaya ka la lah ban pynliem noh ïa ka Jharkhand da 5-3 kol. U Mebanlamlynti Marsharing u la khur ïa ka hat-trick da kaba thep marwei haduh saw kol bad ïa kawei pat la thep Khaiñkupar Ïawphniaw.
Katba ka Punjab ka dei ka kynhun kaba la lah ban pynliem noh ïa ka Odisha da 1-0 kol ha kawei pat ka jingïakhun semi final kaba ar.
“Ngi la long ba la pynkhreh ban ïakhun tyngeh ha kane ka jingïakhun final. Watla ka Punjab ka long ka kynhun kaba khlaiñ, hynrei nga khmih lynti ba lyngba ka jingtrei shitom lang da baroh ki rangïalehkai ngin sa lah ban kynjoh sha ka thong.
