Shillong, K’Lyngkot 30
Ka lympung ïalehkai Under-16 Boys Football League 2023-24 ba la pynïaid da ka Shillong Sports Asso -ciation ka la nangjam shaphrang ha kaba ka Upper Shillong Colt, Pay For Right F.C bad ka Rangdajied United FC ki la ïoh jingjop ha ka sngi Ba-ar.
Ha kane ka jingïakhun kaba la long ha SSA Stadium Polo, ka Upper Shillong Colt ka la pynliem noh ïa ka Mawpat SC da 4-1 kol.
Wat la ka Mawpat ka la ïoh ban pynkhihjar nyngkong eh ha ka minit kaba 19 lyngba u Divinson Mylliemngap, hynrei ka Upper Shillong Colt ka la lah ban ïakhun tyngeh ha kaba tang hadien shi minit ka la lah ban pynïakhaid kylla lyngba u Nijestar Sun.
Ka Upper Shillong Colt ka la pynbud biang ïa ka kol kaba ar lyngba u Damankhraw Syndon ha ka minit kaba 28. Ïa kiwei pat ki ar kol la thep da u Rimeki Lyngdoh ha ka minit kaba 29 & 35 na ka bynta ban khur syndon ïa ka jingjop.
Ha ka jingïakhun kaba ar ka PFR ka la pynliem noh ïa ka Ïaitylli SC lyngba ka shi kol ba la thep da u Arkirang Nongrum ha ka minit kaba 59.
Ka Lah Bet SC ka la shah pynliem noh ha ka Rangdajied United FC da 3-0 kol. Tang mar ïasdang ka jingïalehkai ka Rangdajied ka la ïoh ban pynkhihjar nyngkong eh lyngba u Miky Paul Marweiñ ha ka minit kaba 6. Kane ka kynhun ka la pynbud biang ïa ka kol kaba ar lyngba u Jordon Bareh ha ka minit kaba 26 bad ïa ka kol kaba lai la thep da u Stevenson Kharsyntiew (42) na ka bynta ban khur syndon ïa ka jingjop.
Haba phai sha ka jingïakhun kaba khatduh hapdeng ka Shillong Soccer Scout bad ka Mawlai SC ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Ka jingïalehkai jong ka 1st Division Football League 2023-24 ha ka sngi Balang kan long hapdeng ka Umphyrnai SC pyrshah ïa ka Malki SC ha ka por 2:45 janmiet.
