Amman, K’lyngkot:
Ka Jordan ha ka Sngi U Blei ka la pyntip ba ka jing-leit thombor jong ka Drone ha khappud ka Syria bad kaba la shim ïa ka jingim jong 3 ngut ki shipai US kam shym dei kaba jia hapoh u pud u sam jong katei ka ri.
Kumta u Muhannad Mubaidin u la ong ba katei ka kam thombor ba la thmu khnang pyrshah ïa ki shipai ka US kam shym la jia hapoh u pud- u sam ka Jordan bad ka dei ka jingthmu leit thombor ïa ka jaka treikam ki shipai Al-Tanf ha Syria, ha kaba ki shipai ka US ki iatrei lang bad kitei ki shipai na ka bynta ban rat dyngkhong ïa ki kam thombor jong ki lehnoh ha kitei ki bynta.
La ong ba kane ka long ka sien ba nyngkong ïa ki shipai ka US ba kin shah thombor ha ka thaiñ Middle East naduh ba khie ka thma hapdeng ka Israel bad ki lehnoh Hamas ha kane ka por. Kumta la ong ba kane ka jingjia ka lah ruh ban nang pynkhih win ïa katei ka thaiñ bad kaba lah ruh ban nang pynheh ïa ka jingiakynad khamtam bad ka Iran.
Namar ka kynhun lehnoh Hamas ka la dep maham ruh ba ka jingkyrshan jong ka United States ïa ka Israel haba ïadei bad ka jingleit hiar thma jong ka Israel pyrshah ïa ka Gaza ka long kaba bakla bad ba ki ri Muslim jong ka pyrthei baroh kawei kin ïeng ban ialeh pyrshah ïa kane.
U President ka United States- u Joe Biden ha ka Sngi U Blei, u la ong ba hadien ba la wad bniah bha halor katei ka jingjia, u la iathuh ba la shem ba katei ka long ka kam thombor jong ki kynhun lehnoh na Iran kiba ju treikam bha hapoh Syria bad Iraq.
Kumta ruh u Biden u la bynrap shuh-shuh ba ka United States kan nym salia ïa kum kitei ki jingjia hynrei kan nang pynjur ïa ka jingiatrei lang bad kan trei shitom ban rat dyngkhong ïa baroh ki kam thombor jong ki lehnoh.
Katba, na ka liang u Lamphang ka kynhun lehnoh Hamas, u Sami Abu Zuhri, u la ong ba ka jingshah thombor jong kitei ki shipai US ka long ka khubor bad ka jingmaham sha kito ki ri kbia ai jingkyrshan ïa ka Israel ha ka jingleit hiar thma jongka sha Gaza.
Namar la ong ba ki la don kumba 150 tam ki jingshah shah thombor pyrshah ïa ki shipai ka US bad jong kiwei ruh ki ri kiba iateh lok bad ka US kiba treikam bad kiba don ha Iraq bad ha Syria.
