Ranchi, K’lyngkot:
U President jong ka seng BJP ha Jharkhand u Babulal Marandi hynnin ka sngi u la kynthoh jur ïa u Hemant Soren bad u la pynsaphriang ïa ka khubor ha kaba ïadei bad ka Poster jong ka jingjah jong u kaba la buh ruh da ka buskit kaba T. 11,000 sha kito kiba ai jingtip shaphang jong u bad haei ba u don.
Kine baroh ki la long hadien ba la tharai ba u Soren u la phet rieh hadien ba ka kynhun Enforcement Directorate (ED) ka la pynlong ïa ka jingleit khynra ha ka jaka sah jong u kaba don ha Delhi ha ka Lah Sngi U Blei. Kumba la ïathuh, la ong ba u Soren um shym don ha ka ïingsah jong u ha ka por ba la don ka jingleit khynra, ha kaba kane ka la pynlong ïa ki heh jong ka kynhun ED ba kin kynnoh ba u la jah ne phet rieh.
Ha ka Poster ba la pynbna khubor da u Marandi, uba long u nongïalam jong ka liang pyrshah ha Jharkhand Assembly, ïa u Soren la batai ba u long u briew uba jrong da kumba 5 phut 2 inshi, uba phong da ka sopti rong lieh, ka patlun ïong bad ka sliper. Katkum ba la thoh ha ka Poster la pynshisha ba u Soren u la jah da palat 40 kynta bad la ïohi khatduh ïa u ba u la ïaid bad ki pulit pahara jong u ha ka por 2 baje mynstep.
La bthah ruh ba ki briew kin ai jingtip ha ka ïingsah jong u Myntri Rangbah kaba don ha Ranchi lada ki shem ne tip ïa ka jaka ba u Soren u don, ha kaba la bynrap shuh shuh da kaba ong ba yn sa ai buskit halor kane da T. 11,000 sha kine kiba ai khubor shaphang jong u. Na ka liang u Soren, lyngba ka Email kaba u la phah sha ka kynhun ED, u la ong ba u la mynjur ban ïatreilang bad ka kynhun tohkit ha ka ïingsah jong u kaba ha Ranchi ha ka 31 tarik, Kyllalyngkot ha ka por 1 baje nohphai sngi, kata mynta ka sngi.
