Guwahati, K’lyngkot:
Ha ka jingjia kaba sngew thamula, uwei u nongkhaïi drok uba la shahkem ha ka Lah Sngi U Blei ka 29 tarik, Kyllalyngkot, u la lait phet na kti jong ki pulit ha Dhubri, Assam.
Kumba la ïathuh ka tyllong khubor, la ong ba ki pulit ki la pynlong ïa ka jing-leit khynra ha Dhubri; ka jaka sor kaba don ha Assam ha kaba la ïohkem ïa u nongkhaïi drok uba shyrkhei ba la tip kyrteng kum u Siddique Ali.
Ïa ka jingleit khynra la pynlong da ki pulit ka AMCo Road Bazar Police Station bad hadien ba ki la ïohkem ki la rah ïa une nongkhaïi drok sha patok na ka bynta ka jingtohkit.
Ha ka por ba dang ïalam ïa u sha ka jaka treikam jong ki pulit, une u nongkhaïi drok u la leh thok ïa ki pulit bad u la lait phet.
Ki pulit ki la pynlong ïa ka jingthwet kaba jur ban ïohkem biang ïa une u ba la lait phet.
Ha kaba ïadei bad kane ka jingjia, la ong ba kane ka dei ka sien kaba ar ha kaba une u briew uba la shahkem u la lait phet na kti jong ki pulit ha Dhubri.
