Shillong, K’Lyngkot 30
Ka Crystal Palace ka la mynjur ïa ka jingsiew kumba £18m na ka bynta ban soi ïa u rangïalehkai shapdeng ka Blackburn Rovers u Adam Wharton.
Une u rangïalehkai ba dang 19 snem ka rta un leit sha London bad kane ka jingsiew ka lah ban kiew shaduh £22m.
U Wharton u dei u rangïalehkai uba la san na ka shlem ai jinghikai jong ka Blackburn bad hadien u la ïoh ban ïalehkai haduh 51 sien na ka bynta kane ka klob.
Ha ka jingshisha ka Crystal Palace ka la buh ka jingtyrwa hadien ba ka la shah kyntait noh ha ka taiew ba la lah na ka bynta utei u rangïalehkai U-20 ka England, hynrei u la mynjur ïa ka jingpynbeit da katei ka klob jong ka Championship.
Kumba ka paw u Wharton, uba la dei u hynmen jong u Scott uba ïalehkai na ka bynta ka Blackburn, u la ïoh ban ïalehkai 26 sien mynta ka aïom bad u la ïoh ban thep ar kol.
Une u rangïalehkai u la shah pynshong ben ha ka por ba ka Blackburn ka la jop ïa ka Wrexham ha ka wat kaba saw jong ka FA Cup ha ka lah sngi U Blei.
Na ka liang u coach ka Rovers u Jon Dahl Tomasson u la ong, “Ka la don ka jingtyrwa ha kine ki khyndiat sngi ba la lah ha kaba ka klob ka la kyntait. Nga sngew ba kane ka long ka jingjied kaba biang eh.”
“Ngi tip bha ba u Adam u long u rangïalehkai ba kynsai bad ngi sngewthuh ba ki don ki khubor hamsaïa haba ngi don ïa u rangïalehkai ba kynsai, hynrei kane ka lah ban urlong ia u Adam ba u lah ban mih ban leit ïasoh noh sha kawei pat ka klob.”
“Kane ka dei ka jingim ha ka jingïalehkai phutbol, hynrei kawei kaba ngi lah ban ong shaphang u Adam ka long ba ngi sngew sarong ïa u lada u ïalehkai ha kane ka klob ne lada u leit ïalehkai noh sha kawei pat ka klob.”
“Manla uwei pa uwei u rangïalehkai ki don ïa la ki jingangnud. U Adam u la ïoh ban lehkmen ha ka kam ïalehkai phutbol, hynrei kan long ka kabu ksiar ba un ïoh ban ïalehkai ha ka Premier League.”
