Ka Jylla jongngi ka Jylla ka bym don jingmih kaba lah ban pyndap bam ïa ki briew ka Jylla, kaba bun ngi bam mluh ka Sorkar Kmie. Hynrei ngi beiñ pat ïa u Modi bad ka BJP. Ka jingioh ïa u khaw ba duk kum BPL, AAY bad kiwei kiwei ki jingmyntoi ka long ka kam ba khraw ïa ka sorkar u Modi, Myntri Rangbah ka ri. Ka jingioh ïa ki um bam um dih ha kiba bun ki shnong ha nongkyndong bad ki paiñkhana ka long ka kam kaba khraw palat liam bym pat ju don ki Sorkar kiba mynshuwa kiba lah ban ai kum mynta ha ka Sorkar u Modiji. Hynrei kiba bun ki beiñ ki khoh ïa ka Sorkar u Modi bad kim treh ban ai vote ha ka BJP ka parti u Prime Minister Narendra Modi. Kumno pat ngi dang nud ban beiñ ïa ka Sorkar kaba leh bha ïa ki paidbah. ïa u khaw ai paidbah (APL) la pynduna ka jingai namar la bun bah hap pynlut ha kiba duk ba rangli hapoh ka ri. La katta ruh ngim treh jied ïa ka BJP. Lada lah ban ai pynioh synshar ïa ka BJP san snem nga ngeit ba ka Jylla jongngi kan kiew haduh ha u bnai kum ka kam ha ki por hyndai. Ngi lah ban ioh ki surok kiba heh ba ïar kum ki 2 – lane, 4 – lane ha baroh kawei ka Jylla lada ngi ai lad ïa ka BJP ba kan ioh bat ia ka jingsynshar hapoh ka Jylla jongngi. Ngi lah ruh ban ioh ki Fly – over kiba lah ban pynlait ïa ka jingkhapngiah jong ki surok ka sor Shillong bad kiwei kiwei ki jaka ba la kham long sor. Kane ka long ka jingiohi jongngi kum u riewpaidbah uba buddien bad peit jawdud ia ka Jylla Assam ka Jylla ba marjan kaba la kiew shaba palat ha ki kam pynroi pynpar hapoh ka Jylla jong ki. Te kumno ko paidbah ka la dei ka por ba ngi dei ban klet noh ïa ka jingsngew niam ka jingsngew pher jait pher kynja, hynrei ngi dei ban peit ïa ki kam ba bha ba kano kano ka sorkar ka wanrah na ka bynta ka jingbha salonsar hapoh ka Jylla. Ne phi/ngin ong ym donkam ki kam pynroi hapoh ka Jylla ? Namar ki kam pynroi ki ai jingmyntoi ïa ka ri bad ka jaitbynriew.
C. B. Iawphniaw
