New Delhi, K’lyngkot:
Ki 10 tylli ki jylla kiba wan hakhmat eh ha kaba ïadei bad ka jingdon bun eh ki kolej ha India ki kynthup ïa ka Rajasthan, Tamil Nadu, Madhya Pradesh, Andhra Pradesh, Gujarat, Telangana bad West Bengal, kawei pa kawei ki don kumba 30 ne palat ki kolej ha kaba ki la don da ki lak ngut ki khynnah pule.
Katkum ka jingïathuh ka kaiphot ba la pynlong ïa ka jingwad bniah, la ong ba ha Uttar Pradesh, ki la don kumba 8,375 tylli ki kolej ha kaba ka la kiew sha ka 8,114 tylli ha ki snem ba hashwa bad ki la don kumba 30 tylli ki kolej kiba don mar shi lak ngut ki khynnah pule.
Ki jylla bad ki Union Territory kiba don bun tam ki kolej kiba don da ki lak ngut ki khynnah pule, ki kynthup ïa ka Karnataka (66), Telangana (52), Andhra Pradesh (49), Himachal Pradesh (47), Puducherry (53) bad ka Kerala (46).
“Ka Maharashtra ka la wan ha ka kyrdan kaba ar ha kaba ka la don da kumba 4,692 tylli ki kolej. Ka Karnataka ka la wan balai ha kaba ka la don da kumba 4,430 tylli ki kolej ha kaba ka Rajasthan ka la wan basaw da 3,934 tylli ki kolej. Ka Tamil Nadu ka la wan ba shiphew da 2,829 tylli ki kolej ha kaba la bud da ka Madhya Pradesh da 2,702 tylli ki kolej,” la ïathuh ka tyllong khubor.
“Ka Andhra Pradesh ka la wan ha ka kyrdan kaba 7 ha kaba ka la don da kumba 2,602 tylli ki kolej bad kaba phra ka dei ka Gujarat ha kaba ka la don 2,395 tylli ki kolej. Ka Telangana ka la wan ha ka kyrdan kaba 9 ha kaba ka la don da 2,083 tylli ki kolej ha kaba la bud da ka West Bengal kaba don 1,514 tylli ki kolej,” la bynrap ka kaiphot.
