Gaza, K’lyngkot:
Katkum ki khubor, la ong ba ki shipai ka Israel wat haduh ka Sngi U Blei ruh ki dang leit hiar thma ia ki lehnoh Hamas kiba don ha ka phang Shathie jong ka nongbah Gaza. La ong ba kane ka la jia wat hapdeng ka jingiapynbeit bad jingiashong jingialang hapdeng ki heh ka Israel, ka Egypt bad ka Qatar na ka bynta ban ioh pynkut noh ia ka thma ha Gaza.
Kumjuh ruh na ka liang ka tnat iada jong ka Israel, ka la iathuh ba ka Israel ka dang phah ia ki shipai jong ka ban leit hiar thma tyngeh ha ki bynta ba Shathie jong ka nongbah Khan Yunis, kaba long ka nongbah ba ka thma hapdeng ki shipai Israel bad ki lehnoh Hamas ka dang iaid shaid shaid.
Ka tnat ka koit ka khiah jong ka Gaza ha ka Sngi U Blei, ka la pyntip ba 24 ngut ki paidbah nongshong shnong ka Gaza ki la shu duh ei ia ka jingim na ka jingther bom bad jingther ‘namding jong ki shipai ka Israel hapoh ka nongbah Khan Yunis ha katei ka sngi.
Nalor nangta la ong ba ka jingther bom jong ki liengsuiñ ka Israel ha ka jaka sah ki phetwir Shati ha ka phang Shatei jong ka Gaza, ka la shim ia ka jingim jong 10 ngut ki briew ha katei ka sngi. Kane ka wan jia hadien ba ka tnat shipai Israel ka la pyntip halor ka jingleit hiar thma sha ki phang Shatei bad phang pdeng jong ka Gaza ha katei ka sngi.
