New York, K’lyngkot:
U heh ka New York, u Eric Adams bad ka dkhot ka ïingdorbar ha New York ka Jenifer Rajkumar ha ka taiew ba la dep, ki la ioh ban pynieng bad ban plie ïa u mawdur ba thymmai jong u nong-ialam bakhraw ka ri India – u Mahatma Gandhi habar ka jaka mane hapoh Queens, hadien ba la pynieng bujli ha ka jaka jong u mawdur barim uba la shah pynjulor arsien ha ki snem ba la leit.
Ha u snem ba la dep, la ong ba utei u mawdur jong u Mahatma Gandhi uba don ha South Richmond Hill, u la shah pynjulor noh. Hynrei da ka jingiatrei lang bad ka mynsiem sngewlem jong ki nong-ialam ka New York, la lah pat ban pynieng biang ïa utei u mawdur ba thymmai ha kane ka por sa shisien pat. Kane ka long kum shi bynta ban pyni ba kam don kano-kano ruh ka jingisih jaitbynriew hapoh katei ka ri.
Namar kumba la iohi ïa ka nuksa bad ka jinghikai ba la pyni da u Gandhi, la iohi ba ka hok ka jop halor baroh kiei-kiei.
Ia utei u mawdur jong u Gandhi la ioh ban pynieng biang ha kane ka taiew ba dang shu dep ha katei kajuh ka jaka kaba don habar ka jaka mane Shri Tulsi Mandir ha South Richmond Hill.
La ong ba ïa utei u mawdur jong u Gandhi, la don kiba leit pynjot bad pynpra dusmon ha u Nailar 2022 da ki kynhun kiba ibeiñ ïa kiwei pat ki jaitbynriew ba nabar. Pynban na liang ki bor pyniaid ka New York ha kane ka por ki la ioh ban pyni ïa ka mynsiem ka jingsngewrit bad jing-sngew lem bad kumjuh ruh ban pynshai ba kam ju don kano- kano ruh ka jingibeiñ ne jingisih jaitbynriew hapoh katei ka nongbah bad ha ka ri ruh baroh kawei.
Kumta kitei ki nong-ialam ha katei ka sngi ba la plie ïa utei u mawdur ba thymmai ruh ki la phah ïa ka khubor sha ki paidbah ka US bad kumjuh sha ka pyrthei baroh kawei da kaba ong ba ‘ka jingieid kan synshar halor ka jingisih’.
Kumba la dep ban kdew haneng ba ïa utei u mawdur barim, la leit ban pynjulor dusmon da ki riew shim kabu bad ki runar ki bym don jing-ithuh hynrei kiba shun ïa ki jaitbynriew nong India kiba don ha katei ka nongbah, bad kumta ki la leit ban pynsniew dur ïa utei u mawdur barim uba la pynieng hakhmat ka jaka mane ki jaitbynriew Hindu ha katei ka jaka.
