Shillong, K’Lyngkot 30
Ka kynhun ïalehkai phutbol Under-19 jong ka ri ka la mih ban leit sha Bangladesh ha ka sngi Ba-ar ban shim bynta ha ka SAFF U19 Women’s Championship 2024.
Kane ka lympung ïalehkai kan long ha Dhaka naduh 2 haduh 8 tarik u Rymphang.
Na ka liang ka coach jong ka kynhun ïalehkai ka ri ka Sukla Dutta ka la pynbna ïa ki 23 ngut ki ‘thei ïalehkai ki ban mihkhmar ïa ka ri India ha kane ka lympung.
Kane ka kynhun ïalehkai U-19 ka ri kaba la wan ha ka kyrdan ba-ar ha u snem 2021, kan sdang ia ka jingïalehkai kaba nyngkong pyrshah ïa ka Bhutan ha ka 2 tarik, ha kaba yn pynbud sa ka jingïakhun pyrshah ïa ka Bangladesh kaba la bat ïa ka nam lahduh, ha ka 4 tarik bad ïa ka Nepal ha ka 6 tarik.
Ïa kane ka lympung yn pynlong ha ka dur jong ka ’round robin format’ ha kaba ki ar tylli ki kynhun kin ïakhun pyrshah ha ka final na ka bynta ban ïaknieh ïa ka nam lahduh. Ïa kine baroh ki jingïalehkai yn pynlong ha ka Mostafa Kamal Stadium kaba ha Dhaka.
Ki kyrteng ki 23 ngut ki ‘thei ïalehkai ka ri
Goalkeeper: Khushi Kumari, Anika Devi Sharubam & Hempriya Seram.
Defender: Heena Khatun, Vikshit Bara, Sonibia Devi Irom, Juhi Singh & Nishima Kumari.
Midfielder: Shivani Toppo, Lalita Boypai, Akhila Rajan, Rivka Ramji, Arina Devi Namei -rakpam, Cindy Remruatpuii Colney, Menaka Devi Lourem-bam, Sibani Devi Nongmei-kapam & Thoibisana Chanu Toijam.
Forward: Babita Kumari, Nitu Linda, Sulanjana Raul, Neha, Pooja & Sahena TH.
