Shillong, K’Lyngkot 30
Ka Shillong Lajong Foot-ball Club ka la rah ïa ka nam lahduh ha ka lympung ïalehkai phutbol ba la tip kum ka Nasha Mukt Bharat Abhiyan U-15 Boys Football Tournament.
Kane ka nam jop ka la wan hadien ba ka la lah ban pynliem noh ïa ka Rangdajied United FC da 4-0 kol ha ka jingïakhun final kaba la long ha ka sngi Ba-ar ha madan MFA kaba ha Polo.
Ïa kine ki kol la thep mar ar kol da u Mewan-jingshai Kharmuti bad u Dabetskhem Rympei.
Ïa kane ka lympung la pynïaid da ka shlem treikam jong ka tnat Social Welfare lem bad ka shlem u District Sports Officer, East Khasi Hills District.
Ïa ki khusnam sha kine ki kynhun la sam da ka kongsan ka Kong E. Kharshandi kaba dei ka ophisar jong ka tnat Social Welfare officer lem bad u khlur ïalehkai phutbol ka Jylla uba dang shu ïohpdiang ïa ka khusnam Kiang Nangbah mynta u snem, u Phrangki Buam bad uba dangïalehkai mynta na ka Lajong ha ka lympung ïalehkai I-League.
