Guwahati, K’lyngkot:
U Myntri jong ka Kynhun Myntri ha Assam u Pijush Hazarika u la ong ba kiba bun ki nongïalam na ka seng Congress ki la thmu ban mih noh na ka seng ha ka 5 tarik, Rymphang.
Kane ka jingkren jong u ka la long hadien ba ka President barim jong ka Assam Youth Congress ka Angkita Dutta bad ka MLA barim jong ka seng Congress ka Bismita Gogoi ki la leit ban pynïasoh bad ka seng BJP.
U Hazarika u la ong ba kiba bun na ki nongïalam na ka seng Congress kin sa mih noh na ka seng ha ka 5 tarik, Rymphang, ha kaba la ong ba kane ka jingkyntiap seng jong ki dkhot ka seng kan sa ïai bteng. “Kiba bun na ki nongïalam kin sa mih na ka seng Congress ha ka 5 tarik, Rymphang. Nga kyrmen ba ha ka 5 tarik, kin sa don shuh ki heh nongïalam bad ki nongbud jong ka seng ki ban sa mih na ka seng Congress. Man sa sngi ju don kiba Phone bad ki kwah ban pynïasoh bad ka seng jong ngi. Shisien ba nga ong ba ka seng Congress kan sa dam noh, ka dei ba ki la pyndonkam bakla ïa nga. Mynta phin sa lah ban ïohi. Mynta kane ka jingkhihwin kan sa ïai bteng, kan ym sangeh. U Himanta Biswa Sarma u la trei na ka bynta ka jylla, u Narendra Modi u la trei na ka bynta ka ri. Bad dei namar ba ki briew ki ïeid ïa ngi, wat kine ki nongïalam jong ka seng ka liang pyrshah ki la ai jingkyrshan ïa ngi bad pynïasoh bad ka seng BJP. Kane ka kam kan sa ïai bteng,” la ong u Hazarika.
Hashwa ban pynlong ïa ka ilekshon Lok Sabha ka seng BJP ka la nang ïoh jingkyrshan shibun naba ka Angkita Dutta bad ka Bismita Gogoi ki la leit ban pynïasoh bad ka seng BJP. Ha ryngkat bad ki, u President barim jong ka AASU u Dipanka Nath bad u Vice-President barim jong ka AASU u Prakash Das ruh ki la leit ban pynïasoh bad ka seng BJP. Ha kaba ïadei bad kane, u nongïalam barim jong ka seng Aam Aadmi Party (AAP) u Kamal Kumar Medhi ruh u la thmu ban leit pynïasoh bad ka seng BJP. Ka dei ha kane ka sngi ba u Hazarika u la pynpaw ba kin sa don shuh shuh ki nongïalam jong ka seng Congress ki ban sa mih noh na ka seng bad leit ban pynïasoh bad ka seng BJP.
