Nongpoh, K’Lyngkot 31
Ka Tbeh Jingshai Umroi Football Association (TJUFA) ha ka Sngi Ba-ar ka la plie pyrda ïa ka lympung ïalehkai phutbol miet ba la tip kum ka ‘Night Football Knockout Tournament’ kaba lehse kan dei kaba nyngkong eh ha ka district kaba la pynïalehkai ha ka por miet.
Ïa kane ka lympung la wan ban plie paidbah da u MLA ka Umroi konstitwensi, u Bah Daman-bait Lamare ha ka jingïadon ryngkat jong u President ka TJUFA, u Bah Shalan Sylliang, u Secretary ka TJUFA, Bah Lover Roy Lyngdoh, u Rangbah shnong ka Umroi Umdohbyrthih, Bah P.B Sylliang bad kiwei kiwei.
Ha kane ka sngi plie pyrda ïa kane ka lympung, ka jingïakhun ka long hapdeng ka kynhun jong ka Ri Bhoi Zone pyrshah ïa ka Clarissa kaba la wan ban sakhi ruh da ki spah ngut ki paidbah ‘riew ïeid phutbol ka thaiñ. Hapdeng ka jingïakhun kaba shongshit bha, ka kynhun jong ka Ri Bhoi Zone ka la lah ban pynliem noh ïa ka kynhun jong ka Clarissa da 2-0 kol.
