Shillong, K’lyngkot 31
Ka tnat ïalehkai ka la mynjur ïa ka kyrteng jong ki nongmareh (long distance) kiba la khur takma ha ka Asian Games kata ka Avinash Sable lem bad u Parul Choudhary, kiba la kyrpad ban leit kilanmet sha Colorado, USA.
Ka Sorkar ka la ai jingbit ruh na ka bynta ki nongïalympat kata ka Anshu Malik bad ka Sarita Mor ki ban leit kilanmet sha Japan bad USA.
Ka Sable bad ka Choudhary kiba la bat ïa ki rekod hapoh ka ri, kin leit kilanmet ha ki jaka ba long kynjang na sla duriaw (high altitude centre) kaba ha Colorado Springs hapoh ka jingïalam u coach u Scott Simmons, ka Mor kan leit sha United States Olympic/Paralympic Training Cen-ter (USOPTC), ha kaba kane ka jaka ïalehkai ka kynthup ïa kiba bun ki nongïalehkai ba kynsai, kynthup ïa ki katto katne ki nongïalehkai kiba la khur takma ha ka Olympic.
Ka Anshu kaba la khur takma rupa ha ka World Championship kan leit sha Kanagawa ban shah hikai ha ka Nippon Sports Science University (NSSU) ia kaba la tip kum ka shlem ai jinghikai kaba la lah ban sei ïa bun ki nongïalympat kiba kynsai jong ka Japan.
Uwei na ki rangïalehkai table tennis u Payas Jain un leit sha Osaka, Japan na ka bynta ban shah hikai ha u coach u Qiu Jian ha ka jingpynlut da ka tnat ïalehkai.
Shuh shuh ka tnat ïalehkai hapoh ka Target Olympics Podium Scheme (TOPS), kan bei tyngka na ka bynta ki nongïalehkai, ki coach bad ki physiotherapy halor ka bai leit bai wan, ka jaka sah bad kiwei ki jingpynlut.
Halor kine ki jingleit kilanmet shabar ri, ka tnat ka la mynjur ruh ïa ki nongsiat khnam (para) jong ka ri ka Sheetal Devi, Sarita bad u Rakesh Kumar kiba la kyrpad na ka bynta ban pynïoh ïa ki tiar ïalehkai, kynthup ïa ki ryntih (compound bows), ki khnam, sight scales bad kiwei.
