Shillong, K’Lyngkot 31
Ka jingïalehkai bha u Abhishek Kumar ka la pynlong ïa ka kynhun ïalehkai kriket ka Jylla ban pynliem noh ïa ka Arunachal Pradesh da 180 run ha ka sngi kaba saw bad kaba khatduh jong ka U-23 men’s Col CK Nayudu Trophy kaba la long ha ka sngi Balang ha madan MCA, Polo.
Da ka jinglah ban khur 5/41 ïa ka Arunachal ha ka inning kaba nyngkong bad 6/57 ha ka inning kaba ar, u Abhishek uba don ïa ka rynïeng kaba jrong u la ïoh ban khur 11/98.
Ban khur ïa ka jingjop ka la buh jingeh bha ïa ka Meghalaya ha kaba nyngkong. Kane ka kynhun ïalehkai ka Jylla ka la shah pynkhyllem baroh ki nongtied ha kaba ka la kamai 203 ha ka sngi kaba nyngkong, hynrei ka liang pyrshah ïa ka lah ban kynjoh sha ki 224 run bad shah pynhap wiket lut baroh ki nongtied. Ka jinglah ban khyrwit haduh 190 run da u Swastic Chettri (not out) u la lah ban pynlong ïa ka Meghalaya ban kynjoh sha ki 368 run ha ka inning kaba ar, na ka bynta ban buh thong ïa ka Arunachal haduh 340 run.
Hynrei ka la buh jingeh ïa ka Arunachal ban kynjoh sha ka thong hadien ba ka la kynjoh tang 89/6 hynnin ka sngi, ha kaba u Abhishek u la lah ban pynhap 3 wiket.
Hynne ka step ula lah ban khur sa 3 wiket. Napdeng kine ki wiket, ki nongtied ka Arunachal kiba la shah pynkhyllem ki long u Mibom Mosu (16) bad u Teli Rade (46).
U Teli u la lah ban khyrwit khyndai tylli ki ‘four’, hynrei ka Arunachal kam shym la lah ban khanglad ïa ki nongkawang bol ba kynsai ka Meghalaya. Uwei u nongtied uba la shah pynhap wiket khatduh u dei u Manish Sharma (2/9).
Ha kane ka sngi la ïadon lang u President ka Meghalaya Cricket Association u Nababrata Bhattacharjee bad u Treasurer u Dhrubajyoti Thakuria. Kine baroh ar ngut ki la ai khublei ïa ki rangïalehkai lem bad kiwei kiba la ïadon bynta lang ba kin dangïai trei shitom ban kynjoh sha ka thong.
Kumba ka long mynta ka Meghalaya ka la jop baroh saw sien ïakhun bad ka la jam sha ka semi final, kaba dangdon sa kawei ka jingïalehkai (round robin) ha kaba kan ïakhun pyrshah ïa ka Nagaland ha la ïing naduh 4 tarik u Rymphang.
