Raipur, K’lyngkot:
Ki la don lai ngut ki pulit Commandos jong ka tnat Central Reserve Police Force (CRPF) kiba la shah pynïap ha ka por ba don ka jingïasiat kaba jur bad ki lehnoh Maoist ha ki bynta khappud jong ka Sukma bad ka Bijapur distrik kiba don ha Chhattisgarh, la ïathuh ki heh pulit, ha ka sngi Ba-ar, ha ka jingthombor kaba la long pyrshah ïa ka kynhun jong ki shipai ïada ri kiba la pahara ïa ka jaka treikam kaba dang shu shna thymmai.
Nalor kine ki la don sa kumba 15 ngut kiwei pat kiba la mynsaw, bad kine baroh ki dei na ka tnat CRPF. Napdeng kine kiba la ïap, arngut ki dei jong ka kynhun (Commando Battalion for Resolute Action) 201st Battalion jong ka COBRA, bad uwei pat jong ka kynhun 151st Battalion ka tnat CRPF.
“Ïa kiba la mynsaw la pynkit da ka liengsuiñ sha ki jaka ai jingsumar kiba don ha Raipur ha kaba la ong ba kine haba ki la ïoh jingsumar ki la lait na ka jingap jingma,” la ong u Inspector General ka tnat pulit ha Bastar u Sunderaj P.
Ka jingïasiat kaba markylliang ka la sdang ha ka por 1 nohphai sngi jong katei ka sngi ha ka shnong Teklagudem, kaba dei ka jaka ba la jur bha ki kam pyntriem jong ki lehnoh Maoist, khyndiat kynta hadien ba la buh ïa ka kynhun ki shipai pahara ha ka jaka treikam kaba dang lah shna thymmai.
