Shillong, K’Lyngkot 31
Ka Nongpdeng bad ka Jersey Kings CC ki la ïoh jingjop ha ka lympung ïalehkai 3rd Division Shillong Cricket League ha ka Sngi Balang ha madan Urkaliar, Shillong.
Ha kane ka jingïakhun ka Nongpdeng ka la pynliem noh ïa ka Metallica Nongpdeng da 3 wiket. Ka Metallica kaba la kam trai ban tied nyngkong, ka la kamai 141 run bad shah pynkhyllem 10 wiket ha ki 17.4 over. U Kalyan Barua u la tied 33 run na ki 22 bol bad u Ashish Gurung u la ïoh 23 run na ki 13 bol. Katba u Donbok Hujon bad u Wanbor Lamare ki la ïoh mar 2 wiket.
Haba wan shimti ïa ka pali kaba ar, ka Nongpdeng ka la kynjoh sha ka thong da kaba ïoh 142 run bad shah pynhap 7 wiket ha ki 19.2 over. U Maitshaphrang Khongjee u la tied 34 run na ki 21 bol bad u Damonlang Sun u la ïoh 29 run na ki 35 bol. Katba u Rahul Barua u la ïoh 3 wiket bad ïa ka shi wiket la khur da u Imran Ali. Ïa ka nam Man of the Match la khur da u Robert June Nongsiej.
Haba phai sha kawei pat ka jingïakhun kaba ar, ka Jersey Kings ka la jop da 8 wiket ia ka Slog Warriors. Ka Slog Warriors kaba la tied nyngkong, ka la kamai 125 run bad shah pynhap 9 wiket ha ki 20 over. U Subhakar Turha u la ïoh ban khyrwit ïa ka shiteng spah kaba 56 run na ki 45 bol bad u Rakesh Raj u la ïoh 20 run na ki 19 bol. Katba u Vishal Sunar bad u Vivek Sunar ki la ïoh mar 2 wiket.
Hynrei haba wan shimti ïa ka pali kaba ar, ka Jersey Kings ka la lah ban kynjoh sha ka 126 run bad shah pynhap 2 wiket ha ki 13.4 over. U Bicky Raj Das u la khyrwit ïa ka shiteng spah kaba 77 run na ki 31 bol bad u Raj Biswas u la ïoh 25 run na ki 19 bol. Katba u Sonu Prasad u la khur 1 wiket. Ïa ka nam Player of the Match la khur da u Bicky Raj.
