Tel Aviv, K’lyngkot:
Katkum ki khubor la ong ba imat ka lehnoh Hamas kam shym treh ban mynjur halor ka jingtyrwa sangeh thma ba shipor jong ka Israel bad kam shym treh ruh ban pyllait noh ia kito kiba ka la rahbor bad set haduh mynta. La ong ba ka Hamas kan nym treh ban ia mynjur ia kano-kano ka jingtyrwa lada ka Israel kam kynthup ia ka jingphah mih noh ia ki shipai na Gaza ha kitei ki jingtyrwa jong ka ban pyllait noh ia ki briew na ka kti ki lehnoh Hamas.
Katei ka jingpyni dak jong ka Hamas ba kam shym pdiang ia katei ka jingtyrwa jong ka Israel ka long hadien ba la ioh jingtip ba ka Israel ka la shong jingialang ha Paris ban sangeh noh shipor ia katei ka thma kumba katto-katne bnai khnang ban ioh pyllait noh ia kito kiba la shah bat ha ki lehnoh Hamas baroh.
Kumta, la ong ba ka Hamas ha ryngkat bad kiwei de ki kynhun lehnoh na Palestine bad na ki ri ba marjan, ki la bthah ia ka Israel ba ka dei ban kynthup lang ia ka jingphah mih noh ia ki shipai jongka Israel napoh u pud- u sam jong ka Gaza Strip. Lem kumta, ka Hamas kan ym treh ban mynjur ia kano- kano ruh ka jing tyrwa na ka Israel lada kam lah ban phah mih noh ia ki shipai jong ka ruh ha kajuh ka por.
