Shillong, K’lyngkot 31
Kan long ka jingsarong bad ka sngi sah jingkynmaw ïa ka Jylla hi baroh kawei namar ka kynhun ïalehkai Under-18 ka la ïoh ban khur ïa ka takma ksiar ha ka sien kaba nyng -kong eh ha ka Khelo India Youth Games 2024.
Kane ka la wan urlong hadien ba ka la lah ban pynliem noh ïa ka Punjab da 2-0 kol ha ka jingïakhun final jong ka jingïalehkai phutbol ki shynrang ha ka Sngi Balang ha Jawaharlal Nehru Stadium kaba ha Chennnai.
Kane ka nam jop ka la wan urlong lyngba ki ar kol ba la thep da u Badondor Marbaniang na ka bynta ban pynlong ïa ka Meghalaya ban khur syndon ïa ka nam lahduh.
Ha kane ka jingïakhun final, u Badondor u la ïoh ban thep kol nyngkong ha ka kylla step da kaba shut najngai bad kawei pat u la thep ha ka kylla miet da kaba shut da ka kjat ka diang na kyndong jong ka ‘box’. Wat hapdeng ka jingjrong rynïeng bad jingkhlaiñ bor, pynban ki rangïalehkai ka Punjab kim shym la lah ban pynphai haduh kaba kut jong ka jingïalehkai.
Wat la ka Jylla ka la phah tang kawei ka kynhun ïalehkai sha ka Khelo India Youth Games, pynban kaba sngewtynnad ka long kane ka kynhun ïalehkai phutbol hapoh ka jingïalam u Bah Jeffery Warlarpih (Football Coach) ka la lah ban pynpaw ïa ka jingtbit na ka bynta ban wanrah burom ïa ka Jylla da kaba ka la lah ban pynliem shi syndon ïa ka Punjab ha kane ka jingïakhun final.
Kum ban shu pynkynmaw hashwa ban jam sha ka semi final, ka Megha-laya ka la lah ban pynpaw ïa ka jingtbit ha ka Group -A ha kaba ka la lah ban pynliem ïa ka Utter Pra-desh da 4-1 kol, kymjuh ïa ka Punjab da 2-1 kol bad ïa ka Tamil Nadu da 2-1 kol. Te ha ka semi final, ka Meghalaya ka la lah ban pynliem ïa ka Jharkhand da 5-3 kol.
Halor kane ka jingjop, na ka liang u kapten ka kynhun u Colinsalmon Lyngdoh u la pynpaw ba kane ka jingjop ka dei kaba la khmih lynti la kham slem. “La kham slem ngi la ïai ap khmih lynti ban khur ïa kane ka nam bad mynta ka wan la wan urlong ha ka jingim jong ngi.”
“Nga ainguh ïa U Blei uba la don ryngkat bad ngi naduh kaba sdang bad haduh kane ka khyllip mat. Nga pynpaw ka jingsngewnguh ïa u Coach, u Asst. Coach bad Manager kiba la pynbit pynbiang ïa ka kynhun hi baroh kawei. Ngi long shisha kum ki khun namar ki la ïalam ïa ngi ha ka lynti kaba dei ha kane ka kam ïalehkai phutbol,” u la bynrap da kaba ong ba ka Khelo India ka la plie lad ïa ka kynhun ba kan ïakhun pyrshah ïa kiwei pat ki kynhun ïalehkai ki jylla jong ka ri.
