Washington, K’lyngkot:
Katkum ki khubor la ong ba ka House Speaker jong ka United States ka Nancy Pelosi ha kine ki khyndiat sngi ba la leit, la ïohsngew ba ka la kren tohmet bad leh ibeiñ ia ki nongïakhih kiba leit poi shaduh sha ka iing sah jong ka haba iadei bad ka thma hapdeng ka Israel bad ka Hamas ha kane ka por.
Kumta la ong ba ka Lamphang barim jong ka iing Myntri ka US, ka la kren tohmet ia kitei ki paidbah nongïakhih kiba don marjan bad ka iing jong ka da kaba ong ‘khie leit phai noh sha China’ namar la sngewthuh ba kitei kiba pyrshah halor ka jingleit iasnoh kti lang jong ka US haba iadei bad ka thma jong ka Israel pyrshah ia ka Gaza, ki bun hi ba ki dei ki nong China. Kumta ka Pelosi ha katei ka sngi ka la beh ia kitei ki nongïakhih ba kin leit pynkulmar sha China ym ban ïakhih ha iing sah jong ka namar kam lah ban leh eiei haba iadei bad ka jingdawa jong ki.
Ha katei ka jingjia la iohi ia ka Pelosi kaba la shah ker tawiar da ki nongïakhih katba ka dang pyrshang ban leit rung sha kali ha ka jaka set kali ha iing jong ka. Kumta la ong ba ha katei ka por, kitei ki nongïakhih ki la leit ban tur sha ka bad ban rah ia ki jingthoh ha ryngkat ka jing pyrta ba ka US ka dei ban leh eiei ban pynkut noh ia ka thma hapdeng ka Israel bad ki lehnoh Hamas namar ka jingktah kaba jur ia ki paid nongshong shnong ba lui-lui ka Gaza namar la ong ba katba ka US ka dang leit ban ai jingkyrshan bad pynshlur ia ka Israel, katei ka thma kan nang neh bad kan nang heh bad pur ruh wat sha kiwei kiwei de ki ri jong ka pyrthei namar ka jingiakynad hapdeng ka Israel, Gaza bad ka US pat bad kiwei ki ri Muslim kiba ai jingkyrshan ia ka kynhun lehnoh Hamas.
Dei ha katei ka por la ong ba ka Pelosi ka la kiew jingbitar bad kren tohmet ia kitei ki paidbah nongïakhih da kaba ong khie leit phai noh sha China.
Ha kine ki khyndiat por ba la leit, la ong ba ka la mih ka jing pyrshah na ki katto katne halor ka jingkren jong ka Pelosi, ha kaba ka la ong ba kito ki nongïakhih kiba kyrshan ia ki nong Palestine hapoh Gaza, ki dei kiba don jingiadei bad ka Russia ruh kumjuh. Kumta, kane ka jingkren jongka ha ki por ba la leit ruh ka la pynmong bad pyn bitar ia kitei ki paidbah nongïakhih namar ka jingkdew kti bad jing pharep kulmar jongka haba iadei bad ka jing-iakhih bad jingpyrshah jong ki.
