Ka jingkhapngiah ka sor Shillong ka long kaba la i triem na ka snem sha ka snem. Naduh ka jingbun ki kali haduh ka jingkhapngiah ki jaka shong jaka sah, ym i don jingkyrmen ïa kane ka sor ba kan kham kylluid. Kat shaba phai, la shu da ka jingkhapngiah kaba long ruh kum ka jingpyntieng. Hapdeng kane ka jingkhapngiah ka sor, ka sorkar jylla ka la rai ban buh noh sa ïa ka Secretariat ha New Shillong lem bad kiwei pat ki shlem treikam khnang ban pynkylluid khyndiat khynsoit. Hynrei lada bakla ha ka saiñdur, wat ka New Shillong kan sa long pat sa kawei ka sor Shillong kaba ngi ïohi mynta. Wat ki nongïalam jong ki shnong kiba hajan bad ha New Shillong ki la dep kyntu lypa ïa ka sorkar ba kan shna noh shwa da ki surok kiba heh, ‘flyover’ bad kiwei khnang ban lait na ka jingkhapngiah. Kine ki nongïalam shnong ki la dep ban ïohi lypa ïa ki jingeh lada ym sdang naduh mynta ban shna pynheh ïa ki surok bad ban buh da ki ‘flyover’. Ngim kwah ba ka New Shillong kan dei ka Shillong kaba mynta lym kumta kata ka kyntien ‘New’ kam don jingmut hangno-hangno.
Ka sor Shillong ka thnem man la ka sngi namar ka jingwan ki kali kiba nabar jong ka sor bad na kiwei ki jylla. Kam dei kaba suk ban pynïaid ïa ki kali hapdeng ka jingdheng kaba jur. Ngi ïohi ba sha kiwei pat ki sor kum ha Guwahati, kam da jynjar than haduh katta-katta namar ka jingbun ki lad, jingheh ki surok, jingdon ki ‘flyover’. Lada sahkut nawei, lah ban ïaid sa nawei. Hynrei ha Shillong kam long kumta. Lada don ka dheng kali ha Motphran, ka jingsahkut ki kali kan poi shaduh Nongthymmai. Ki don ki lad kiba kham rit ban poi sha ki surok bah bapher-bapher tangba lada ïaid na kita ruh, yn sahkut hajuh. Ngim don lynti pat da kumwei hynrei ban ïa sngap beit man-man namar ka jingpynwan dur ïa ka Shillong ka la bakla naduh ki spah snem mynshwa. Ngi lah ban tei pop ïa kito ki snem kiba la leit noh, hynrei ka dei ruh ka kamram jong ka pateng kaba mynta ban leh eiei ban pynkylluid katba lah ïa ka sor.
Ka sorkar kam len ba ka dheng kali ka dei ka jingeh khamtam ba kane ka jaka ka long lum bad ka jynjar ban pynmih ne shna surok thymmai. Nalorkata, ka la pynpaw ba kiba bun ki jaka ha Central Shillong ki dei ki jong ki shipai lane kita ki Defence Land. Ka long kaba jynjar ban ïoh ïa ki jaka shipai ban pynkylla sha ki jaka paidbah. Hynrei lada don ka mon, lah ban pynlong kam. Ngi la ïohi ïa ka jinglong kam ha ka jingpyrshang ban ïoh pyndonkam paidbah ïa ki jaka shipai. Kane ka dei ha ka por ba ka sorkar ba la ïalam da u (L) Bah EK Mawlong ka la don ha ka bor. Hapdeng khyndiat bnai, kane ka sorkar ka la lah ban pynkohnguh ïa ki bor ha Delhi ban ai lem ki jaka shipai ban ïoh pyndonkam na ka bynta ka jingmyntoi ki paidbah. Ki sorkar kiba wan hadien ki la ïa pyrshang ban ïakren ha Delhi tangba ki dei ban kham pyneh ïa ki jingïakren khnang ba ka kam kan urlong.
U Myntri Rangbah Conrad K Sangma u dei ban shimkhia biang bad ka Sorkar India ban ïakren halor ka jingdonkam ban ïoh ïa ki katto katne ki jaka shipai khnang ban pynkylla sha ki jaka paidbah ban kham suk ki nongshong shnong. Ym don kano-kano ka mat kaba ym lah ban ïakren bad ban poi sha ka jingïasngewthuh jingmut. Ngi ïohi pat ba kane ka sorkar kam da shimkhia than shuh halor kane ka mat watla kiba bun na ki jaka shipai ki don beit hapdeng jong ka sor Shillong. Lada ym shimkhia ka sorkar, mano pat? Ynda ïoh sa katto katne ka khyndew na ki shipai, ka sorkar kan sa lah ban thaw lad ban shna ïa ki jaka pynïeng kali, ban pynheh ïa ki surok bad kumta ter-ter. Kat bym pat lah ban ïoh ïa ki jaka shipai, ngin ym lah shuh ban pynkylluid ïa kane ka sor kaba la dap smam.
Ka dheng kali ha Shillong, kaba la hap ban ïakren shi ïakren na ka por sha ka por, ka dei namar ka jingkhapngiah ki surok, ka jingbun palat ki kali, ka jingïaknieh ban ïoh poi nyngkong watla ym don khusnam na ka bynta kita kiba wan nyngkong, ka jingduna ki jaka pynïeng kali bad ka jingbymlah ban thaw ïa ki surok thymmai. Ki surok ki long kumjuh, ki kali ki la nang kha haduh ba la i shyrkhei. Ki kali ki la khapngiah ha ki surok shnong namar bym don jaka set. Nalorkata, ka Shillong, kaba dei ka pdeng jong ka jylla, ka pdiang ïa ki hajar tylli ki kali kiba wan na kiwei pat ki distrik bad jylla bamarjan man la ka sngi. Ki kali kiba wan na kylleng ki hap ban ïaknieh ban rung sha Shillong la ki dei kiba wan ïew wan hat lane kiba wan kit ïa ki nongjngohkai pyrthei lane kiba kit ïa kiba wan phah sumar bad kumta ter-ter.
