New Delhi, K’lyngkot:
Katkum ki khubor la ong ba ki para khynnah pule bad ki nonghikai jong utei u samla uba la tip kyrteng kum u Neel Acharya, ki la dap da ka jinglyngngoh tang mar ia bna ia katei ka khubor halor ka jingïap jong u hadien ba u la jah rngai bad u khlem poi shuh sha ka jaka pule ka Purdue University kaba don hapoh Indiana bad la ioh jingtip ba utei u samla u la jah naduh ka Sngi U Blei. Hynrei tang hadien katto katne por pat la shem noh ia ka met jong u napoh ka phyllaw jong katei ka skulbah kaba u leit pule bad la ithuh ba ka dei ka durkhmat bad ka met jong utei u khynnah pule na katei hi ka skulbah uba la ju tip kum u Acharya.
La ong ba katei ka skulbah ka dang shu pyntip hi halor ka jingjah rngai jong utei u khynnah pule bad ka la phah ia katei ka jingpyntip sha ki pulit hynrei kim shym la poi pyrkhat ba utei u khynnah pule u don hapoh ka phyllaw bad kaba hap hapoh jong katei hi ka jaka pule.
Kumta, ki bor pyniaid katei ka jaka pule ki la pynbna ia katei ka khubor ba sngewsih ba khlem poi pyrkhat katei ka jaka pule kan duh noh ia utei u khynnah uba trei shitom bad uba biang ha ka pule- puthi bad uba long ruh ka nam- ka burom ia ka jaka pule ba u don.
U Acharya u dei ha ka laiñ ‘Computer Science’ bad ka ‘Data Science’ hapoh ka skulbah John Martinson Honours College. Ki para khynnah samla ba ia pule lang bad kiba ju sah lang bad u ha kajuh ka kamra, ki la iathuh ba u Acharya u long u khynnah uba sngewtynnad haduh katta bad uba baroh ki ju ieid bad sngewtynnad namar ka jinglong ba kyrpang ba u don.
Katkum ki kot-ki sla ba u don, la iohi ba u Neel Acharya u la pyndep ia ka jingpule na ka skul ha Pune bad u la leit bteng pat ia ka jingpule ba kham shajrong ha Purdue ha u snem 2022.
