Shillong, K’Lyngkot 31
Ka tnat Sports and Youth Affairs jong ka Sorkar Jylla kan pdiang burom ïa ka kynhun ki rangïalehkai phutbol (U-18) ka ban wanphai na Chennai ha ka Sngi Palei ha kane ka nongbah.
Kane la long hadien ba kane ka kynhun ka la lah ban khur ïa ka takma ksiar ha ka sien kaba nyngkong eh ha ka Khelo India Youth Games 2024, hadien ba ka la lah ban pynliem noh ïa ka Punjab da 2-0 kol ha ka jingïakhun final ha ka sngi Balang ha Jawaharlal Nehru Stadium kaba ha Chennnai.
Kumta katei ka tnat ka la pynkhreh da ka trok ka ban kit ïa katei ka kynhun ïalehkai na ka bynta ban ïaid kylleng ka nongbah. Kane ka jingïaid kan sdang na Banalari World Cars, Mawlai Petrol Pump Mawlai, Ïew Rynghep, Seng Khasi College, Jaïaw Mawbynna, Jaïaw Pdeng Main Road, Mawkhar Main Road, Motphran, Police Bazar, DC Office, Raj Bhawan, IGP Additio -nal Secretariat, Main Secretariat, DC Office, Wards Lake, Polo Market bad ban pynkut ha madan MFA kaba ha Polo.
Ha kawei pat ka liang, ka Meghalaya Football Association ka la ai khublei ïa katei ka kynhun ïalehkai kaba la lah ban khur ïa ka takma ksiar ha ka Khelo India Youth Games 2024 kaba la long ha Tamil Nadu.
Kane ka jingjop ka pyni ïa ka jingtrei shitom ki khynnah ïalehkai ban pyni ïa ki sap ïalehkai ba kyrpang jong ki. “Kane ka jingjop ka long kum ka jingai mynsiem ïa kiwei pat ki rangïalehkai kylleng ka Jylla ba kin long kiba trei shitom,” la pynpaw kat kum ka kyrwoh ba la pyllait da u President ka MFA u Bah Hamletson Dohling.
