Agartala, K’lyngkot:
U President jong ka Tripura Pradesh BJP u Rajib Bhattacharya ha kine ki khyndiat sngi ba la leit, u la ïai ban da kaba ong ba ka jingthmu kaba kongsan jong ka seng BJP ha ka jylla ka long ban pynïoh ïa ka jingjop ha baroh ar tylli ki Lok Sabha konstitwensi ha Tripura khnang ban lah nang pynkhlaiñ shuh shuh ïa ki rukom treikam jong u Myntri Rangbahduh u Narendra Modi ha ka ilekshon ka ban sa long ha une u snem 2024.
Ka Tripura ka la don ar tylli ki Lok Sabha konstitwensi kiba kynthup ïa ka East bad ka West Tripura. U Bhattacharya u la kren ïa kine ki kyntien ha ka jingïalang ba la pynlong ha ka shlem treikam jong ka Pradesh BJP ha ka lah sngi U Blei.
“Ha kaba ïadei bad ka jingkhmih bniah halor ka Lok Sabha, ka Pradesh BJP jong ngi ka la trei bha. Da ka jingbuh jingmut ban pynlong ïa ka ilekshon ban wan, ngi la don jingthmu ban pynlong Myntri Rangbahduh biang ïa u Narendra Modi. Ha ka jylla jong ngi, ngi la don ar tylli ki Lok Sabha konstitwensi, bad ki kyrtong jong ka seng BJP jong ngi khlem pep kin sa lah ban wanrah ïa ka jingjop ban pynkhlaiñ shuh shuh ïa ki kti jong u Myntri Rangbahduh u Modi. Kum shi bynta ban pynurlong ïa kane, ngi la pynlong ïa kiba bun ki jingïalang jong ka seng da bun bun sien,” u la ong.
U la ïathuh shuh shuh ba ha kine ki khyndiat sngi, ka seng BJP ka la pynlong ïa ki jingïalang bad ki Self-Help Groups (SHGs) bad sdang ïa ka Gao Chalo Abhiyan.”Mynta ngi la pynlong ruh ïa ki jingïalang bad ki kynhun bapher bapher,” u la bynrap.
Ka seng ka la don jingkyrmen ban ïohrah ïa ka jingjop khamtam hadien ba la sakhi ba ki la don palat 58,000 ngut ki nongthep vote kaba la long ruh ha ka sien kaba nyngkong ha ka jingdon bun jong ki kiba la soi ba kin long ki dkhot jong ka seng kaba bat ïa ka jingsynshar ha Tripura ka Bharatiya Janata Party (BJP), la pynbna u nongaiktien jong ka Bharatiya Janata Yuva Morcha, u Amlan Mukherjee, ha ka jingïakren bad ki nongthoh khubor.
Kane ka jingdon jong kiba bun ki dkhot jong ka seng BJP ka la long hadien ba la dep ban pynlong shen ïa ka jingpynrung dkhot ïa ki briew ha ka seng da ka kynhun ki samla jong ka seng BJP.
U Mukherjee u la batai shai da kaba ong ba ka prokram ba la tip kum ka National Membership Drive, kaba la long ha kajuh ka sngi bad ka Voters Day, ka la lah ban pyndonkam da ka Mobile Application ban lum jingkheiñ na ka jingdon bun tam ki nongthep vote kaba la long ruh ha ka sien kaba nyngkong kiba la leit ban pynïasoh bad ka seng.
