Thiruvananthapuram:
Ka ïingbishar ha Kerala ha ka Sngi Ba-ar ka la rai pynrem ban pynïap ha kti ka aiñ ïa 15 ngut ki dkhot jong ka seng Popular Front of India (PFI) ha kaba ïadei bad ka kam pynïap briew kaba la jia ha u snem 2021 halor ka jingshah pynïap jong u nongïalam ka kynhun OBC jong ka seng Bharatiya Janata Party (BJP) u Ranjith Sreenivasan.
U Ranjith Sreenivasan, uba la 40, snem ka rta u la shah pynïap ha kaba u la shah mait shah pom da ki tiar pynmynsaw ha ka ïingsah jong u kaba don ha Vellakinar ha ka jaka sor ka Alappuzha kaba don ha Kerala ha ki 12 ngut ki dkhot jong ka kynhun runar ha ka step jong ka 19 tarik, Nohprah jong u snem 2021.
Baroh kine ki 15 ngut kiba la shah kynnoh donkti ha ka jingjia, kiba dei ki dkhot jong ka kynhun kaba la shah ñiew beaiñ mynta ka Popular Front of India (PFI) bad ka kynhun seng kaba trei ha ki kam saiñ pyrthei ka Social Democratic Party of India (SDPI), ki la shah rai pynrem ha ka 20 tarik, Kyllalyngkot ha ka ïingbishar.
Ïa kane ka rai ban pynïap ïa ki ha ki kti jong ka aiñ la pynbna da ka Additional District Judge jong ka Mavelikkara ka V G Sreedevi.
Ka jingpynshitom kaba tyngeh ba la rai pyrshah ïa kine kiba la shah kynnoh, ka la ong ba kane ka kam jong kine ki runar ka la paw ba ki la long ki nongpynïap briew kiba shyrkhei bad kiba la shah pyntbit bad ka kam sniew jong ki ka la long kaba shyrkhei haduh katta katta ha kaba ki la shim ïa ka jingim jong une u lanot hakhmat ka kmie jong u, i khun bad ka kurim bad ka la paw ba ka la long ka jingjia kaba shyrkhei tam bad ka bym ju kham jia koit.
Ka rai pynrem, ka la ong ba kine ki briew ki la shah pynshisha ba ki la donkti ha ka kam sniew ha kaba ki la shim ïa ka jingim jong u Sreenivasan, uba long u State Secretary jong ka kynhun BJP OBC Morcha.
Ïa kine ki runar kiba la shah rai pynïap ha ki kti jong ka aiñ la tip kyrteng kum u Naisam, Ajmal, Anoop, Mohammad Aslam, Salam, Saffaruddin, Abdul Kalam, Manshad, Jaseeb Raja, Navas, Sameer, Nazir, Zakir Hussain, Shaji bad u Shernas Ashraf.
