New Delhi, K’lyngkot:
U nongïalam jong ka Rashtriya Janata Dal u Tejashwi Yadav u la mih na ka shlem treikam jong ka Enforcement Directorate (ED) hadien phra kynta jong ka jingshah tohkit ha kaba ïadei bad ka jingshah kynnoh donkti ha ka kam bamsap kaba la mih lyngba ka jingïapeiñ jaka bad ka jingai kam sorkar sha kiba thep kam.
Ïa u Symbud Myntri Rangbah barim jong ka Bihar la ïohi ba u la kaweh kti ïa ki nongkyrshan jong u kiba don shabar jong ka jaka treikam jong ka kynhun ED.
U Tejashwi u la poi ha ka shlem treikam jong ka seng ED ha ka por 11.35 mynstep jong ka sngi Ba-ar ha ryngkat ka jingpahara jong ka kynhun ki shipai bad kiba bun ki dkhot jong ka seng RJD bad ki nongkyrshan jong u ki la ïalum bad pyrta da ki kyntien kiba pyrshah kum shi bynta ban ai jingkyrshan ïa u.
Une u la leit mih hakhmat ka kynhun tohkit shi sngi hadien ba u kpa jong u uba long u heh nongïalam jong ka seng RJD u Lalu Prasad Yadav u la shah kylli jingkylli lajan 10 kynta ha ka kynhun tohkit jong ka sorkar kmie ha kaba ïadei bad kajuh ka mukotduma.
U Lalu u la shah kylli jingkylli halor ka jingshah kynnoh donkti ha ka kam bamsap kaba la mih na ka jingïapeiñ da ka jaka da kaba aikam sorkar sha kiba bun. Kane ka kam bamsap ka la jia ha ka por ba u Lalu Yadav u dang long u Myntri ba dei khmih ïa ka tnat Railway hapdeng u snem 2004 bad 2009.
Nalor u National President jong ka seng RJD, ïa ka mudkotduma la kynthup lang ruh ïa ka kyrteng jong u Railway General Manager ha katei ka por.
Kum shi bynta ban thungkam ïa kine ki nongthep kam ha ka tnat Railways, u Lalu Prasad Yadav u la shah pynshisha ba u la ïoh ïa ki jaka ba la aiti da ki trai jaka kiba dei ki nongthep kam bad da ki bahaïing jong ki ha ka kyrteng jong ka kurim ka Rabri Devi bad ka khun jong u ka Misa Bharti ha kaba la pynpaw ba la thied ïa kine ki jaka ha ka dor kaba duna ban ïa kaba dei ban long.
Ka kynhun CBI ka la buh da ka jingmudui mukotduma ha u bnai Risaw jong u snem ba la lah pyrshah ïa ki Myntri Rangbah barim jong ka Bihar kata ïa u Lalu Prasad bad ka Rabri Devi, ka khun jong ki ka Misa Bharti, bad ïa ki 13 ngut kiwei pat ha kaba ïadei bad ka kam bamsap.
