Shillong, Rymphang 01
Ka Director jong ka tnat ïalehkai ka Jylla ka Kong Isawanda Laloo ka la pynbna ba ka Sorkar Jylla kan pynkup burom ïa ka kynhun ki rangïalehkai Under-18 ka Jylla hadien ba ka la lah ban khur ïa ka takma ksiar ha ka sien kaba nyngkong eh ha ka Khelo India Youth Games 2024.
“Lyngba kane ka jingwanrah burom, na ka liang ka Sorkar Jylla kan pynkup burom ïa kane ka kynhun ha ka 5 tarik mynta u bnai,” la pynpaw ka Kong Isawanda ha ka jingpdiang burom ïa katei ka kynhun ha ka Sngi Palei ha kane ka nongbah hadien ba ka la wanphai sha la ïing.
Kane ka kynhun ïalehkai phutbol ka la lah ban pynliem noh ïa ka Punjab da 2-0 kol ha ka jingïakhun final kaba la long ha ka sngi Balang ha Jawaharlal Nehru Stadium kaba ha Chennnai.
Haba ai jingkren ha kane ka sngi, ka Director ka la ai khublei ïa kane ka kynhun kaba la lah ban ïalehkai bha naduh kaba sdang ha katei ka lympung. “Ngi sngew-kmen ban ïohi ba kane ka kynhun ka la lah ban ïalehkai bha naduh kaba sdang jong kane ka lympung bad kam shym la shah rem wat tang shisien ruh.”
Ha kane ka sngi la ïadon lang u Working President ka MSOA u Bah John F Kharshiing, General Secretary Bah Finely Pariat, u President ka Meghalaya Football Association Bah Hamletson Dohling, Secretary Bah Sunesh Syiem, Treasurer Bah Prosper Warjri, Vice President Bah Cliff Nongrum, Bah Hering Shangpliang, u Asst Director ka tnat ïalehkai Bah Paia War Nongbri, Bah Khroobok Passah bad kiwei.
Hashwa ban pdiang burom ha kane ka sngi, na ka liang ka tnat Sports and Youth Affairs jong ka Sorkar Jylla ka la pynlong ïa ka ‘Truck Road Show’ da kaba pynshong ïa ki khynnah hapoh ka trok kaba la pynitynnad bha na ka bynta ban ïaid kylleng ka nongbah.
Kane ka jingïaid kan sdang na Banalari World Cars, Mawlai Petrol Pump Mawlai, Ïew Rynghep, Seng Khasi College, Jaiaw Mawbynna, Jaiaw Pdeng Main Road, Mawkhar Main Road, Motphran, Khyndailad, DC Office, Raj Bhawan, IGP Additional Secretariat, Main Secretariat, DC Office, Wards Lake, Polo Market bad ban pynkut ha madan MFA kaba ha Polo.
Kham shwa ïa kane ka kynhun la pdiang burom ruh da u District Sports Officer (DSO) Ri Bhoi District u Bah Bobby Lyngdoh Nongbet ha kad liengsuiñ kaba ha Guwahati. Ïa kane ka kynhun la pdiang burom ruh hapoh ka shlem treikam u Myntri Rangbah ka Jylla u Conrad K. Sangma bad ruh ha kamra treikam u Myntri ka tnat ïalehkai u Bah Shakliar Warjri.
