Shillong, Rymphang 01
Ka long ka khubor kaba sngewtynnad ban tip ba u Bah Jeffrey Warlarpih u la lah ban pynurlong ïa ka Jylla na ka bynta ban khur ïa ka nam lahduh haduh lai sien lai wat ha ki lympung ïalehkai hapoh ka ri.
Ïa kane la pynpaw da u Secretary ka Meghalaya Football Association (MFA) u Bah Sunesh Syiem ha ka jingpdiang burom ïa ka kynhun ki rangïalehkai U-18 ka Jylla kaba la wan phai ïing ha ka sngi Palei kum ka lahduh hadien ba ka la khur ïa ka takma ksiar ha ka Khelo India Youth Games 2024 da kaba pynliem noh ïa ka Punjab da 2-0 kol ha ka jingïakhun final ha ka sngi Balang ha Chennai.
“Ka nam lahduh ba nyngkong kaba u Bah Jeffrey u la lah ban ïalam bad btin lynti ïa ka Meghalaya ka dei ka Sub Junior Nationals ba la long ha Mumbai ha ki snem 2013-14, bud biang sa ka nam lahduh ha ka Sub Junior Nationals kaba la long ha Kalyani kaba ha West Bengal, bad bynrap sa bat ka nam lahduh ia ka Khelo India Youth Games.”
Kumta u Bah Sunesh u sngew ba ka jingdon ki lympung ïalehkai ba kyrpang ïa ki khynnah, ka jylla ka lah ba kan bteng ban sei shibun ban long ka lawei ïa ka kynhun ïalehkai ka Jylla.
“Nga khmih lynti ba kane ka kynhun ïalehkai U-18 kaba la ïashim bynta ha ka Khelo India Youth Games kan sa long ka lawei na ka bynta ka kynhun ialehkai (senior) ka ban mihkhmat ïa ka Jylla ha kiwei pat ki lympung ïalehkai.”
Shuh shuh u Bah Sunesh u la ai jingkitbok kitrwiang ba kin nangiai pynneh ban long kiba biang ha ka discipline khlem da klet ïa ka pule puthi namar ha kane ka juk kaba mynta ka kam ialehkai ka ïaid ryngkat bad ka jingnang jingstad bad ruh ba ki lah ban ioh rung kam ha ki tnat treikam bapher bapher.
