Chennai, Rymphang:
Ki la don palat 50,000 ngut ki dkhot jong ka Joint Action Council of Tamil Nadu Teachers Organisations and Government Employees Organisation (JACTO-GEO) kiba la pynlong da ka jingïakhih ha kylleng ka jylla Tamil Nadu. Kane ka jingïakhih ka long ban dawa na ka sorkar jylla ba ka la dei ban pyntreikam biang da ka skhim kaba rim ha kaba ïadei bad ka baibam tymmen, ban pyndap ha ki 3.5 lak tylli ki kam balait ha ki tnat treikam sorkar bad ban pyntreikam biang ïa ki shuti kaba la weng noh ha u snem 2020, napdeng kiba bun kiwei pat ki jingdawa.
Ha Chennai, ka jingïakhih jong kine ki dkhot kine ki seng ka la long ha Nungambakkam.
Katkum ka jingthmu ïakhih jong ka JACTO-GEO, ki nongkitkam kin sa ïakynduhlang bad kiba bun ki nongïalam jong ki seng saiñ pyrthei naduh ka 5 tarik, Rymphang haduh ka 9 tarik, Rymphang na ka bynta ban pan jingkyrshan halor ki jingdawa ba ki la buh.
Nangne yn sa bud sa ka jingïakynduhlang jong ki seng ha ki distrik ban pyrkhat na ka bynta ka jingïakhih ka ban long ha ka 10 tarik, Rymphang. Shuh shuh, la ong ba kan sa don ruh ka jingïakhih kaba shi sngi ka ban sa long ha ka 15 tarik, Rymphang, ha kaba yn sa bud da ka jingïakhih ka bym sangeh ka ban sdang naduh ka 25 tarik, Rymphang.
