Shillong, Rymphang 01
Ka synjuk ïalehkai jong ka Japan ka la pynpaw ha ka sngi Palei ba u Junya Ito u la mih noh na ka Asian Cup kaba la long ha Qatar hadien ba ki la mih jingkynnoh ha ki lad pathai khubor ha kaba ar ngut ki kynthei ki la kynnoh ba ki la shah shoh, hynrei na ka liang jong une u rangïalehkai shapdeng u la kyntait halor kane ka bynta.
Ka JFA ka la ong ba u Ito u la shah kynnoh halor katei ka jingjia kaba la jia ha Osaka ha u snem ba la dep. “U Junya Ito u la mih noh na ka kynhun ïalehkai ka Japan kaba la thmu ban ïashim bynta ha ka Asian Cup kaba la long ha Qatar.”
Na ka liang ki pulit ka Japan ki la pynlong ka jingtohkit pyrshah ïa utei u rangïalehkai ba la 30 snem ka rta, uba la ïalehkai na ka bynta ka kynhun ïalehkai kaba na France ka Reims.
Kumba ka paw u Ito u la ïalehkai haduh 54 sien na ka bynta ka Japan, ha kaba u la ïoh ban thep 13 kol.
“Ngi la ioh ïa ka jingujor pyrshah ïa u bad ngi la sdang ban pynlong ka jingtohkit,” la ong u nongai ktien jong ki pulit ha Osaka.
Kat kum ki khubor la ong ba katei ka jingjia ka la jia ha kawei ka ïingbasa kaba ha Osaka ha u Jylliew jong u snem ba la lah hadien ka jingïalehkai paralok hapdeng ka Japan bad ka Peru.
Na ka liang u Ito u la kyntait halor katei ka jingshah kynnoh namar u la ong ba ka long ka bym dei.
Watla u Ito u la shah kynnoh ba u la ktah kti ïa ki ar ngut ki kynthei, hynrei ym shym la don ki sakhi ki ban pyni halor katei ka jingkylla, la ong uwei u nongïasaid aiñ.
Kumba ka paw u Ito u la ong hapoh ka thup jong ka kynhun ïalehkai ka Japan na ka bynta ka pre-quarter final ha ka Asian Cup kaba la ïakhun pyrshah ïa ka Bahrain ha kaba ka la jop da 3-1 kol.
Na ka liang ka JFA ka la pynpaw ba kan ym bujli rangïalehkai hapoh ka kynhun.
Kat kum ka kyrwoh ba la pyllait da ka klob Reims ka la ong ba watla ka jingshah kynnoh ka long kaba jur, hynrei u Ito un ïai long u dkhot ba pura hapoh ka kynhun.
