Nongstoiñ, Rymphang 01
Kan long lehse ka jingkmen ïa ki samla ïalehkai phutbol jong ka thaiñ Mawshynrut hi baroh kawei, hadien ka jingïai angnud ka jong ki ban ïoh noh ïa ka madan ïalehkai kaba bha kumba long lem kiwei ki district.
Kane ka la urlong hadien ba la pynbha ba ha ka sngi Thohdieng da u Myntri Rangbah ka Sorkar Jylla kum u kongsan un wan ban plie bad buh ïa u mawnongrim na ka bynta ban siang ïa ka madang phlang plastik (Synthetic Artificial Turf) ha ka madan Riangdo, Mawshynrut Civil Sub Division.
Ïa kane ka pyntikna ruh da ki nongkitkam ka Riangdo Youth Sport Social & Cultural Association ha kaba ki la pynpaw ruh ba ka klob ha ryngkat ka dorbar shnong ki la wer ïa baroh ki nongshong shnong jong ka dong bad ka thaiñ khamtam ïa ki nongsynshar shnong jong ka thaiñ hi baroh kawei, ki president bad secretary jong ki klob bapher bapher hapoh ka Mawshynrut Association ba kin sngewbha ban ïawan ha katei ka sngi ha ka por 11 baje mynstep.
Shuh shuh ki la pynpaw ruh ba ha kane ka sngi kan don ka jingbuh ïa u mawnongrim ha ka madan Riangdo ban siang ïa ka Synthetic Artificial Turf bad ka gallery da u Myntri Rangbah ka Sorkar Jylla u Conrad K. Sangma kum u kongsan ha ka jingdon lang u Bah Shakliar Warjri, Myntri ka tnad ïalehkai kum u symbud kongsan, u Bah Methodious Dkhar, MLA ka Mawshynrut bad kiwei kiwei.
