Shillong, Rymphang 01
U President ka Meghalaya Football Association (MFA) u Bah Hamletson Dohling u la pynbna ba shen yn sa sdang noh ïa ka lympung ïalehkai ki khynnah ba la tip kum ka Meghalaya Youth League mynta u snem.
Ïa kane u la pynbna ha ka jingpdiang burom ïa ka kynhun ki rangïalehkai U-18 ka Jylla kaba la wan phai ïing ha ka Sngi Palei kum ka lahduh hadien ba ka la khur ïa ka takma ksiar ha ka Khelo India Youth Games 2024 da kaba pynliem noh ïa ka Punjab da 2-0 kol ha ka jingïakhun final kaba la long ha ka 31 tarik u Kyllalyngkot ha Chennai.
Kane ka dei ka jingangnud katei ka synjuk ïalehkai naduh ba ka la ïoh ïa ki dkhot kiba thymmai ki ban pynthyllun ïa ki kam ki jam ha ka kam ïalehkai phutbol na ka bynta ki saw snem kynthih.
“Shen ngin sa sdang noh ïa ka Meghalaya Youth League ha ka Jylla khnang ba kan long ka jingïarap ban kyntiew ïa ki khynnah kiba don ïa ki sap ïalehkai phutbol,” u la bynrap.
Ha kajuh ka por u la ai khublei ïa kane ka kynhun kaba la lah ban pynpaw ïa ka jingtbit ha ka Khelo India Youth Games da kaba khur ïa ka takma ksiar. “Kane ka pyni ïa ka jingtbit ki khynnah ïalehkai ka Jylla ba kin ïatynjuh bor bad kiwei pat ki rangïalehkai na kiwei pat ki jylla bapher bapher jong ka ri.”
Ha kawei pat ka liang u General Secretary ka MFA u Bah Sunesh Syiem u la kyntu ïa ka tnat ïalehkai ba kan ai jingkyrshan lem na ka bynta ban pynlong ïa ka Meghalaya Youth League mynta u snem. “Nga shim ïa kane kabu ban kyntu ïa ka Director ka tnat ïalehkai na ka bynta ban ai jingkyrshan ha ka ban pynlong ïa kane ka lympung ïalehkai ki khynnah mynta u snem.”
