Shillong, Rymphang 02
Ka Nongpdeng CC ka la pynliem noh ïa ka Slog Warriors da 27 run ha ka lympung ïalehkai 2nd Division Shillong Cricket League kaba la long ha ka sngi Thohdieng.
Ha kane ka jingïakhun kaba la long ha madan Urkaliar Shillong, ka Nongpdeng ka la shimti shwa ban tied nyngkong bad kamai 172 run na bynta ban shah pynhap 8 wiket ha ki 20 over. U Teiborlang Dhar u la khyrwit ïa ka shiteng spah da kaba ïoh 50 na ki 25 bol bad u Maitshaphrang Khongjee u la ïoh 45 run na ki 25 bol. Katba u Manish Prasad u la khur 3 wiket bad 2 wiket da u Roshan Singh.
Haba wan beh ïa ka thong, ka Slog Warriors ka la kamai 145 run bad shah pynhap 10 wiket ha ki 19.3 over. U Roshan Singh u la tied 39 run na ki 20 bol bad u Manish Prasad u la ïoh 25 run na ki 15 bol. Katba u Nerrykupar Dkhar u la khur 2 wiket. Ïa ka nam Player of the Match la ïoh da u Maitshaphrang Khongjee.
Haba phai sha kawei pat ka jingïakhun kaba ar, ka Metallica CC ka la pynliem noh ïa ka Occult da 2 wiket. Ka Occult kaba la tied nyngkong ka la kamai 129 run bad shah pynhap 8 wiket ha ki 20 over. U Pynbhalang Kharsati u la tied 23 run na ki 31 bol bad u Damanbha Roini u la ïoh 22 run na ki 10 bol. Katba u Rahul Barua u la khur 2 wiket bad ïa ka shi wiket la khur da u Imran Ali.
Haba wan beh ïa ka thong, ka Metallica ka la kynjoh sha ka thong da kaba kamai 130 run bad shah pynhap 8 wiket ha ki 19.4 over. U Dipayan Nandi u la tied 31 run na ki 25 bol bad u Sajan Maghaiya u la ïoh 30 run na ki 36 bol. Katba u Rohit Lumbo u la khur 2 wiket. Ïa ka nam Player of the Match la khur da u Sajan Maghaiya.
