Shillong, Rymphang:
Ka Hynñiewtrep Youth Council (HYC) Sengkmie lyngba ka Education Cell hapoh ka jingïalam u Education Secretary, u samla Enlang Sawian bad u Asst. Education Secretary, u samla Bhaboklang Sohshang ha ka 1 tarik u Rymphang 2024, ka la leit ban ïakynduh bad aiti da ka dorkhas sha ka Deputy Commissioner jong ka East Khasi Hills District, ka Kong R.M Kurbah halor ka jingdawa ban buh noh kham bun ïa ki E-Stamping hapoh ka nongbah Shillong.
Ha katei ka dorkhas, na ka liang ka HYC ka la pynpaw ba dei ban don kham bun ki E-Stamping namar hadien ka jingjurip jong ka seng ka la lap ïa shibun ki jingduna khamtam ha kaba ki khynnah pule ki shem shitom ban phah soi ïa ki dulir ne ki ‘Affidavit’ ha ki plidar bad ki hap ban ïeng laiñ da ki kynta namar ba jrong eh u laiñ tang ban ïoh thied ïa ki ‘Affidavit’ bad ban phah soi bad ïa kine ki E-Stamping la lah ban ïoh tang na ka ophis treikam jong ka Deputy Commissioner hapoh ka nongbah Shillong.
Haba kren sha ki lad pathai khubor hadien ba la dep ïakynduh ïa ka DC, u samla Enlang Sawian, u la ong kaba la pynlong ïa ka seng ban kren halor kane ka bynta ka dei ba ha kine ki khyndiat sngi kiba dang shu dep la ïohi ba kiba bun ki samla bad ki khynnah pule ki la hap ban ïeng laiñ da ki kynta tang ban ïoh ïa ki E-Stamping.
U samla Enlang u la ong lyngba ka jingduna jong kine ki E-Stamping ka la buh jingeh shikatdei eh ïa ki nongshong shnong jong ka nongbah kiba kynthup naduh ki muktiar bad wat ki khynnah pule ruh khamtam ha ka por ba ki pyndap ïa ka bai bam jong ki lane ka ‘scholarship’.
“Ka jingeh kaba khraw ka long ba lada ki khynnah pule ki hap ban ïeng kumba 2 lane 3 kynta hapoh katei ka jaka kaba la die ïa kitei E-Stamp, ka jingduhnong kan long ïa ki hi namar ba ki hap ban duh ïa ka jingleit klas ka jong ki tang ban ïoh ïa ki E-Stamp”, la ong u samla Enlang.
Na ka liang ka seng ka la kyntu ruh ïa ki bor ba dei peit ba kin sngewbha ban shimkhia ha kaba ïadei bad kane ka mat na ka bynta ban buh kham bun ki jaka kiba don ïa ki E-Stamping hapoh ka nongbah khnang ba kan pynsuk ïa ka rukom treikam khlem da pynthut bad pynsyrwa kai ïa ka por jong ki paidbah tang haba ap.
“Ngi dawa ba lyngba kane ka ophis jong ka DC ba kan shim ïa ki sienjam ban pyntikna ban pynbun ki nongïarap ha katei ka jaka die ki ban ïarap pynai ïa ki E-Stamp kiba kum ki samla pule bad ki paidbah ki donkam”, la ong u samla Enlang.
Na ka liang ka DC ka la ai ka jingkular ïa ka seng ba kan sa peit bad khmih halor katei ka jingdawa jong ka seng bad kan sa pyntikna ruh ba na ka liang jong ka ophis kan ïaleh ban weng ïa kitei ki jingeh jong ki samla pule bad jong ki paidbah khnang ba kin nym mad shuh ïa kum kine ki jingeh bad ban pynsuk bad ban nym buh ïa u paidbah hapdeng ka jingeh.
