Nongstoiñ, Rymphang 02
U Myntri Rangbah ka Jylla u Conrad K. Sangma ha ryngkat u Myntri ka tnat ïalehkai u Bah Shakliar Warjri ha ka sngi Thohdieng ki la plie ïa u mawnongrim na ka bynta ban tei bad shna ïa ka madan ka ban siang da u phlang plastik (Artificial turf) kaba T. 9 klur tam ha ka madan Riangdo, Mawshynrut Civil Sub Division.
Kane ka jingïoh ban plie ïa u mawnongrim ban shna ïa katei ka madan, lehse kan long ka jingkmen ïa ki samla ïalehkai phutbol jong ka thaiñ Mawshynrut hi baroh kawei.
Nalor u kongsan bad u symbud kongsan, la donlang ruh u MLA ka Mawshynrut u Bah Methodious Dkhar, u R.G. Momin, MLA ka Rambrai, u DC bad SP ka West Khasi Hills, ki dkhot ka Riangdo Youth Sport Social & Cultural Association, ki dkhot ka Mawshynrut Sports Association, ki nongsynshar shnong, ki president bad secretary jong ki klob bapher bapher hapoh ka Mawshynrut Association, ki nongshong shnong bad katei ka thaiñ bad kiwei kiwei.
“Balei ngi ai ïa kine ki stadium bapher bapher, kane kam dei ka jingai kaba ngi sngewkmen ma ngi ki MLA, ki Myntri sorkar, hynrei ka dei ka jingai ban kyntiew ïa ki khun samla” la ong u Bah Shakliar Warjri Myntri ka tnad ïalehkai ka Sorkar Jylla haba kren ha katei ka sngi.
Ha kawei pat ka liang u Myntri Rangbah ka Jylla u Conrad Sangma u la ong ba ha ka shi snem jong ka jinglong MLA u Bah Methodious bad ha ka shi snem ba la shimti u Bah Shakliar Warjri kum u Myntri ka tnad ïalehkai la lah ban mang haduh T. 9 klur tam bad jan T.10 klur ban shna ïa kane ka madan bad u la pynpaw ruh da kaba ong ba, “Ngam tharai ba haduh mynta ka sngi ym don u ban sa poi pyrkhat ba yn sa ïoh ïa ka stadium kaba T.10 klur ïa ka ban sa tei ha Riangdo mynta ka sngi haba la plie ruh ïa u maw nongrim.”
U Myntri Rangbah kum u kongsan u la pynpaw ruh ïa ka jingkular sha u Paidbah ba hapoh ka jingïalam jong u, ka Jylla Meghalaya kan ïoh ïa ki jingtei kiba bit ba biang tam haba ïathew bad kiwei ki jylla khamtam hapoh ka thaiñ shatei lammihngi bad ka lah ban long ruh ha ka ri baroh kawei.
Shuh shuh u la ong ruh ba kaba kongsan tam, ka long ba ym kwah ban pynbit pynbiang tang ïa ki jaka ba la kham sor lane ha ki headquarter, hynrei ngi kwah ruh ban pynbiang ïa kine ki jingdonkam ha ka ki jaka kyndong ruh kumjuh namar ngi ngeit ba ki nongïalehkai ba tbit ruh ki don sha ki nongkyndong.
“Nga la ïakren bad u Myntri ka tnad ïalehkai ba hapoh 18 bnai kata shwa u Nailur u snem 2025 yn sa ïoh ban wan biang ha kane ka jaka ban plie ïa ka stadium,” u la bynrap.
“Kine ki jait jingtei ngi dangïaleh ban tei ha ki jaka bapher bapher bad phin sa sngewphylla ban tip ba kane ka ka sorkar ka la shna bun ki stadium ha ki 5 bad 6 snem ba la dep ban ïa ki kiba la shna ha 40 snem ba la dep.”
