New Delhi, Rymphang:
U Myntri Rangbah jong ka Delhi u Arvind Kejriwal kumba u la rai um shym leit mih hakhmat ka kynhun Enforcement Directorate (ED) ha ka sngi Thohdieng na ka bynta ka jingshah tohkit ha kaba ïadei bad ka jingshah kynnoh donkti ban kamai ïa ka spah bymhok kaba la mih na ka jingpyndkoh treikam ha ka tnat Excise ha Delhi, la ong ka seng AAP. Ka kynhun ED ha ka sngi Balang ka la dep ban phah biang ïa ka shithi bad ka jingkhot hajir kaba la long ha ka sien kaba san sha u Kejriwal hadien ba u la pep ban leit mih hakhmat ka kynhun ha ki saw tylli ki jingshah khot hajir ha ka kynhun tohkit ha palat ki saw bnai ba la leit. Ka seng AAP ka la ong ba u Kejriwal um shym la leit mih hakhmat ka kynhun na ka bynta ka jingshah tohkit. Kum ka jingong ba kane ka jingshah khot hajir ka dei kaba beaiñ, ka seng ka la ong ba ka kynhun ED ka la ïai phah ïa ka shithi sha u Kejriwal halor ka jingthmu ban kem ïa u. Ka seng AAP ka la kynnoh ruh ba ka seng BJP ka la kwah ban knieh jubor ïa ka bor synshar ha Delhi da kaba kem noh ïa u Kejriwal. Ka seng AAP kan ym ailad da lei-lei ruh ba kum kane ka jingjia kan wan jia.
