Shillong, Rymphang 02
Hadien shi bnai ka jingpynsangeh ïa ka lympung ïalehkai I-League, ka Shillong Lajong FC kan sdang ïa ka jingïalehkai ha la ïing pyrshah ïa ka Inter Kashi kaba na Uttar Pradesh ha ka sngi Saitjaiñ.
Ïa kane ka jingïalehkai yn pynlong ha ka por 7 baje janmiet ha SSA Stadium, Polo. Kane ka long ka sien kaba nyngkong eh mynta ka aïom ba ka Lajong kan ïoh ban ïalehkai ha la ïing lyngba ki jingshai jong ki floodlight.
Kumba ka paw kane ka long ka sien kaba nyngkong ïa kine ki kynhun ba kin ïakynduh pyrshah ha kane ka lympung.
Hadien ki khadwei sien ïakhun, ka Lajong ka la don ha ka kyrdan basan ha kaba ka la kamai 19 point ha kaba ka la jop san sien, ïakhaid saw sien bad shah rem ar sien. Katba ka Inter Kashi ka la don ha ka kyrdan ba phra ha kaba ka la jop saw sien, ïakhaid lai sien bad shah rem saw sien.
