Agartala, Rymphang:
Ha ka jingïatreilang hapdeng ka tnat shipai Border Security Force (BSF) bad ka Sub-Divisional Police Officer (SDPO) jong ka Sabroom Sub-Division ha South Tripura District ki la lah ban pynpulom ïa ka jingrung beaiñ jong ki bar ri ha Komar Kosh, ka bynta khappud kaba don ha Tripura.
Ïa kane ka jingpyntreikam la pynlong ha ka miet jong ka sngi Balang, haba lah ïoh khubor ïa kaba la phah da ki nongtrei jong ka Sabroom Police Station. Kumba la ïathuh ka tyllong khubor la ong ba ka kynhun pulit kaba bun ba la ïalam da u Sub-Divisional Police Officer (SDPO) u Dulal Chandra Datta ka la leit ban pynlong ka jingkhynra ha kiba bun ki jaka kiba don ha ka thaiñ Baishnabpur bad Jalkumba kiba don ha Sabroom, ha kaba ki la suba ba ka la don ka jingwanrung beaiñ jong ki bar ri.
Ha kaba ïadei bad kane ka jingpyntreikam, ki pulit ki la ïoh ban kem ïa arngut ki briew, ïa kiba la tip kyrteng kum u Prati Kumar Tripura bad u Noni Tripura, kine baroh arngut ki dei ki nongshong shnong jong ka Khagrachari distrik ha Bangladesh.
Ki pulit ki la buh jingthoh ha kaba ïadei bad kane ka jingwanrung beaiñ pyrshah ïa kine kiba la shahkem bad ong ba ki la shah ïalam hakhmat ka South Tripura District Court kaba don ha Belonia ha ka sngi Balang. Ïa ki kot ki sla ba la ïoh ban kurup na kine ki briew la pynlong ïa ka jingkhmih bniah na ka bynta ban lap sabut shuh shuh.
