Washington, Rymphang:
Uwei u rangbah, 32 snem ka rta na United States, u la shah kem noh hadien ba la iohi ia ka dur-khih kaba la saphriang paidbah ba utei u briew u la khrai khlieh ia la u jong u kpa bad pyni hakhmat ki paidbah lyngba jong ka rynsan ‘Social Media’ ka ‘YouTube’. Ia utei u briew la ioh ban kem noh ha ka Sngi Ba-ar da ki pulit ka Pennsylvania.
Na ka liang ki pulit ki la rah noh ia utei u briew uba la ithuh kum u Justin Mohn na ka bynta ki jingtohkit kiba bniah halor katei ka kam thombor pyrshah ia la u jong u kpa uba la don 68 snem ka rta bad uba la ju ithuh kum u Michael Mohn. Kane ka la jia hapoh ka iing sah jong ki hapoh Pennsyvania.
Katkum ka jing-iathuh jong ki pulit, la ong ba ki la ioh ia ka phone halor ka jingïap jong uwei u tymmen bad ia kane la pyntip hi da ka kmie jong utei u briew- ka Denice. Ka Denice ka la pyntip sha ki pulit hadien ba ka la lap ia ka ka met ba khlem khlieh jong u kurim napoh ka iingsah jong ki ha ka por 2 baje nohphai sngi katba ka dang wan phai na ka kam.
Ynda ki pulit haba ki la leit poi sha katei ka iing, ki shem sa tang ia ka tari ot jing-ot kaba heh ‘Large Kitchen Knife’ napoh ka kamra sum. Hadien kata pat ki la lap ia ka khlieh jong utei u tymmen na ka plastik ba la song bha hapoh jong u khiew shet jingshet. Nalor kata, ki la lap ruh sa ia ki jingsop-kti ba la satah snam na ka jaka bret ñiut jong katei ka iing.
Na ka liang ki pulit ynda la ioh ban tohkit bad bud dien bha, ki la shem ia ka jingphla jong utei u briew ba u kren pyrshah ia ki kam bad jingleh jong u kpa jong u bad ong ba u kpa jong u, u long u nongkhaïi be-aiñ bad u long ruh u nongshukor ia ka ri bad ka jaitbynriew mynta la 20 snem.
