Shillong, Rymphang 02
Ka Kynhun Myntri jong ka Sorkar Jylla ka la ai jingmynjur ban pynjlan ïa ka samoi treikam jong ar tylli ki Autonomous District Council kita ka Khasi Hills Autonomous District Council (KHA DC) bad Jaiñtia Hills Autonomous District Council (JHADC) da hynriew bnai.
Ïa kane la mynjur da ka Kynhun Myntri ha ka jingïalang kaba la long ha ka Sngi Thohdieng ka 2 tarik Rymphang 2024.
Haba pynbna ïa kane ka rai hadien ka jingïalang ka Kynhun Myntri, u Symbud Myntri Rangbah u Bah Prestone Tynsong uba peit ïa ka tnat District Council Affairs u la ong ïa kane ka rai yn sa phah sha u Lat ban ai ka jingmynjur.
U la ong ba ka rai ban pynjlan ïa ka samoi treikam jong kine ar tylli ki district council ka dei halor ka nongrim ba kine ar tylli ki district council ki dang don ha ka jingpynbeit ïa ki shnong ha ki konstitwensi bapher bapher lyngba ki Delimitation Committee jong baroh ar tylli ki District Council kiba la thaw ha u snem ba la dep katkum ka jingaibor jong u Lat ka Jylla.
U Bah Tynsong u la ong ba kine ki Delimitation Committee ki la pan por ban pyndep ïa ki kam haba ïadei bad ka jingpynbeit thymmai ïa ki shnong ha ki konstitwensi. Kumta na ka liang ki Executive Committee jong baroh ar tylli ki District Council ki la phah ka jingkyrpad sha ka Sorkar Jylla lyngba ka tnat DCA, bad na ka liang ka Sorkar hadien ba ka la khmih bniah ïa kane ka la wanrah sha ka Kynhun Myntri kaba la rai ban pynjlan shwa ïa ka samoi treikam jong baroh ar tylli ki District Council da hynriew bnai.
U la ong ba ka samoi treikam jong kine baroh ar tylli ki district council kan kut ha ka 5 tarik u Lber 2024, bad kane ka jingpynjlan ïa ka samoi treikam da hynriew bnai kan sdang naduh katei ka sngi.
Shuh shuh u la ïathuh ba ki Delimitation Committee jong ka KHADC bad JHADC ki dang trei ïa ka kam kaba dei ban pyndep ban pynbeit thymmai ïa ki shnong ki thaw ha ki konstitwensi bapher bapher.
Da kane ka jingmynjur ban pynjlan da hynriew bnai ïa ka samoi treikam jong kine ar tylli ki District Council, ka ilekshon sha Ïingdorbar KHADC bad JHADC kan nym pat long haduh ban da shim rai biang da ka Sorkar.
