Washington, Rymphang:
Ka tnat shipai jong ka United States ha ka Sngi Balang ka la pyntip ba ka la ioh ban ther bom sha bun tylli ki jaka treikam jong ka kynhun lehnoh Houthi ha Yemen.
Kumjuh ruh kawei ka jhad thma jong ka US ka la ioh siat pynbthei ia u ‘namding ba la ther da ki lehnoh Houthi na ka jhad ther bom jong kitei ki lehnoh bad hadien kata ki shipai US ki la ioh siat pynbthei sa ia 3 tylli ki Drone jong ki lehnoh na Iran ha katei hi ka sngi.
Hynrei la ong ba, katba ka US ka dang ther bom sha kitei ki jaka treikam jong ki lehnoh Houthi bad ki lehnoh jong ka Iran ha katei ka thaiñ, ka la wanrah pat ia ka jingma kaba khraw ba ka lah ban mih ka jingiakynad hapdeng ka US bad ka Iran namar ia mynta hi, baroh arliang ki ialeh ban kiar ban lait na ka thma bad ka jingiakynad para ri.
Shuh shuh ruh la ong ba ka United States bad ka Iran ha kine ki sngi ka la sdang ban iapher jingmut bad ban pyni bor markylliang namar ka jingjur ki kam thombor jong kitei ki lehnoh Houthi bad ha kajuh ka por ruh ka jingleit kyrshan jong ka United States ia ka Israel ha ka jingiakhun thma jongka pyrshah ia ki lehnoh Hamas kiba synshar hi ia ka nongbah Gaza jong ka Palestine.
Ym tang ia ka Israel, hynrei ka US ka la ialeh ruh ban ai jingkyrshan ia ka Ukraine naduh ba sdang jong ka thma haduh kine ki sngi bad ka ju ialeh ban pynmih ia ki pisa synñiang naka bynta ka tnat shipai jong ka Ukraine ha ka jingiakhun pyrshah ia ki shipai jong ka Russia naduh ba ka Russia ka la leit hiar thma ia ka Ukraine mynta la kumba 2 snem.
