Shilling, Rymphang 02
U President ka Voice of the People Party (VPP), Bah Ardent Miller Basaïawmoit, u la ong ba ka seng kan nym sei ïa ki nongïalam ne ki MLA ban sam bai dawai, bai kot, bai picnic namar kane baroh ka dei ka kamram jong ka sorkar jylla ba kan pynbiang ïa ki paidbah.
Ïa kine ki kyntien u Bah Ardent u la kren ha ka jingïalang hadien ba la pynskhem ïa ki nongkitkam ka VPP Mawkynrew circle kaba la long ha ka Sngi Thohdieng ha shnong Maw-U-Sam kaba hap hapoh East Khasi Hills District ha ka jingïadonlang u Dr. Ricky AJ Syngkon uba dei u kyrtong MP Lok Sabha ka VPP, u MLA ka Mawryngkneng konstitwensi u Bah Heavingstone Kharpran, u nongaiktien ka VPP u Bah Batskhem Marboh ha ryngkat ka jingsakhi lang ki paidbah.
U Bah Ardent u la ong ba um kwah ban ïohi ba ki paidbah kin leit ban ïeng laiñ ban pan bai dawai, bai kot, bai picnic na u MLA hynrei ka dei ka kamram jong ka sorkar ban pynbiang doktor, ki dawai ha ki jaka sumar, nangta ban shna bha ïa ki ïing skul ban siew tulop bha ïa ki nonghikai bad kiwei de ki jingdonkam jong ki paidbah.
Nalor nangta u la ong ba ki paidbah mynta lada leit sha sor ne nongkyndong ki la shong shit beit ha u prah, wat la kim pat tip ïa u kyrtong uba ka seng kan sa pynbna ha ka ilekshon MDC.
Haba kyntu kynpham ïa ki nongkitkam ka VPP Mawkynrew circle, u Bah Ardent u la ong ba mynta ki la long kiba rem dor ha kaba kiwei ki seng saiñpyrthei kin sa wan khroh ban tyrwa da ki klur ban ai kam kontrak hynrei phim dei ban shah die tad haba kiwei ki seng saiñpyrthei ki wan khroh dei ban skhem ha la ka jong ka nongrim.
Shuh shuh u la ïathuh ba ka seng ka la rai ban ïakhun pyrshah ïa ka kam bamsap ban rat dyngkhong ïa ka jingduk, hynrei ka seng NPP tang namar ba ka bat ïa ka bor synshar ha ka sorkar ka ai kam kontrak kam suplai tang ha ki nongkyrshan lajong katba kiwei pat kim ïoh eiei. Kane ka dei kata ka kam bamsap.
Katba na ka liang u nongaiktien ka VPP, Bah Batskhem Marboh, u la ong ba wat ki khun jong kito kiba don ha ka bor mynta kin sa mad ïa ka jingjynjar hadien habud lada ka synshar-khadar kaba mynta ka ïaid beit ïaid ryntih lada jur palat ka jingbamsap.
U Bah Marboh u la ong ba shisien ba la jur ka jingbamsap, ka jylla ne ka ri kan nym kiew shaphrang hynrei kan hiar arsut. Kumta ka seng VPP kam shym la wan sha ki paidbah tang ha ka por ilekshon hynrei ka wan ban pynshai ïa ka nongrim ban wanrah ïa ka synshar-khadar kaba khuid.
